Thil ho ang reng taka kan ngaih kawppui te tana thil ninawm

Thil ho leh tê anga i ngaih, mahse, chinthana i neih tawh si khan i kawppui nena in inkarah i rin aia thukin nghawng a nei thei a nia. |um hnih khat kha chu a en liam mai mai a ni thei a, mahse, a lo rei hnuah chuan in inkara neuh neuh thlentu a ni thei. Thil chin dawklak leh tih thana kan nei tawh hi ‘a ho mai mai’ kan tih liam puat lai hian, kan kawppui te nena kan inkara harsatna siamtu a lo ni reng thei tlat a ni.
1. Thil tih dan tur hrilh reng mai hi tu pawhin kan ning thin. “Chuti chuan tirawh,” “Tikhan ti suh, tihian ti zawk rawh,” tih ang chi, kan thil tih apianga tihdan tur min hrilh reng tum ang chi hi ninawm tak an ni. Hetianga mi thil dan tur sawi hrilh zuah zuah ching hi kan tam thin, chinthanah te kan nei a, hetiang hi kawppui te tan a ninawm duh hle. I kawppui kha naupang, engkim zirtir ngai a ni tawh bik lo tih hria la, ama duh dan leh thiam danin tih tir ve rawh. Hei vang hian a tih thiam loh pawh tihdan hrilh duh loh tihlam a ni lo tih erawh kan hre dawn nia.
2. A thil sawi laia thil danga lo pakai san leh daih thin emaw, a thil sawi laia thil dang lo tihsan leh daih thin te hi kawppui te tan a ngeiawm duh tih hriat tur. In titi mawlh mawlh a, in thil sawiah khan mahni ngaihdan leh sawi duh te sawina hun inzat in neih a pawimawh a, tawng bik char char awm kha a fuh lo. Chutah i duh i sawi zo a, anin a sawi ve dawn chauh a, thildang i tihsan leh daih emaw, thil dang i ngaihven san leh nghal daih khan a thinrim ru teuh dawn a nia. A thil sawi laklawh laia i rilru lak penna tur thil dang i hmuin i hre thei em em mai a nih chuan i hriat loh karin in inkar tichhetu a ni thei dawn.
3. Thil sawisel peih lutuk leh sawisel tur ngah lutuk te hi kawppui te tana ninawm a ni thuai mai thin. Kawppui te thil tihsual palh leh tih fuh loh deuh hlek te hmu thei em em mai, engamah hmaa sawisel nghal chiam chiam i ching a nih chuan in inkar a chhe thuai ang. Thil tê tham pawh a sawisel zawng awki i hman zel mai chuan in inkar a fuh lo fo ang. A thil tih te fak sak aia sawiselna tur hlir i hmu zut zut zawk thin a nih chuan a rilru pawhin i hriat loh karin a hlat telh telh ang che. A tihsual leh tihdik lohah pawh sawisel loh tur tihna a ni lo va, sawisel peih lutuk, engkima phunna tur hmu reng ang chi kha a nia kan sawi hi. Mahni kawppui te tih that aia kan tihsual hmu thei zawk ang chi kha.
4. Kawppui te dinhmuna indintir kan thiam lo thin hi kawppui te nena kan inkara harsatna thlentu a ni fo. A bik takin an lungngaih changa an dinhmuna indintir a, an tawrh dan kan hriatthiam pui tawk loh hian harsatna a thleng duh hle. Chhiat tawh lam a ni emaw, a hna lama harsatna a tawh a ni emaw, eng emaw rilru hahna a neih chang tein nang chu atan i awm hleithei lo va, a titi pui turin i hman lo thin a, a lungngaihna te i hnem ngai lo va, a harsatna te a sutkian dan tur i ngaihtuahpui ngai lo va, a chhungril hrehawmna te a inphawrhna turin i awm ngai lo a nih chuan a hlat ve telh telh ang che. Nang pawhin buaina leh harsatna chi hrang hrang i nei ang, mahse, chutiang karah pawh chuan kawppui te dinhmuna indintir thiam a, an harsatna leh rilru hrehawmna kan hriatthiam pui hi a pawimawh hle a ni.
5. A thil tih leh awmdan te kha a ni ve tur rengah ngaihsak mai suh. Hei hi nupa tam takin kan tihfuh loh thin a ni. Kan lo inkawp rei deuh tawh hnuah chuan thil reng reng ngai a neih te, a ni ve tur renga inngaih sak te hi a awl tawh em em a, mahse, hei hian kan hriat loh laiin kan inkar a lo eichhe thin. A thil tih thin te kha ngaiah neih sak mai lo va, a tih ve tur hrim hrimah te ngaih sak mai suh. A eirawngbawl te, a insuk te, in chhung a tihfai te, a thil siamthat te, a hnathawh te leh thildang pawh a tam ang, heng a thil leh a ngaihsak thinna zawng zawng che hi a tih ve tur rengah ngaiin, ngaiah kan inneih sak chinah hian kan hriat loh karin kan inkara buaina neuh neuh thlentu a ni duh hle.