Thil tha duhna vanga insawisel hi kan tangkaipui – I&PR minister
Mipui rorelna ramah sawisel ngam loh sawrkar neih a thiang loa, insawiselna erawh a tha duhna avanga insiamthatna tur hawi inhrilh chu tute pawhin kan tangkaipui tih Information & Public minister Lalruatkima chuan a sawi.
Thawhlehni khan I&PR minister hian MJA member-te lengah sawmin an inkawm a. Thuthar thehdarhtuten sawrkar an tawiawmnaah leh thawhhonaah lawmthu a sawi a. Mipui thlantlin sawrkar chu sawisel ngam loh a nih a rem loa, sawrkar tan inenletna tha tak a ni thei, tiin, chutihrualin kan insawiselna danah sawrkar insiamthatna atan a ‘constructive’ lam chu tunlaiin kan bansan hret hret nia a lan tak thu a sawi. Insiamthatna tura insawiselna chu mi tute pawhin kan tangkaipui a, thu dengkhawng tak ni lo, upaten thu khuh taka tawngkam an hman ang kha kan chin chhoh leh a tul tih a sawi a ni.
Chanchinbuten sawrkar khalh ngilna kawnga an hman, editor-te kamchhuak – editorial chu inenletna atan hmanraw pawimawh tak a ni tih a sawi a. Mizo tawng hman dik kawngah chanchinbumiten an thawh hlawk hle tih a sawi bawk.
Thuthar thehdarhna kawnga thiamna tharte chanchinbumiten an hman tangkai ve a tul hle tih I&PR minister hian sawiin, social media kaltlanga thu belhchian dawl lo leh thu diklo vawrhlar a nasat tak avangin, thuthar thehdarhtute chu mipui zirtir kawngah theihtawp chhuahpui turin a sawm tih a sawi.
MJA-te tana sawrkar leh department hmalakna hrang hrangte Lalruatkima hian a sawi bawk.
MJA Gen. Hqrs president C Lalrambuatsaiha leh member dangten media-te harsatna leh beisei an neihte an thlen a ni.
I&PR minister hi secretary M Hualsangi bakah department hotu dangten an tawiawm a ni.