Rorelna tha zawk beiseitute chu ZPM party-a lut turin MLA C Lalsawivunga chuan a sawm.
-- Advertisement --
Zirtawpnia ZPM office-a inkhawmah C Lalsawivunga chuan party pahnih rorelna hnuaiah kum engemawzat kan awm tawh thu leh kan ram roreltuten party atchilhnaah min hruailuh tawh thu sawiin, “An party nih ve loh chuan engmah chanvo neih ve lohnaah min hruailut a, mi tlemte te inhaivurna lam kawnga kan ram rorelna a kal hi a tha lo takzet. Party induhsak bikna hi a rei lutuk tawh a, Mizo khawsak phung a tichhe nasa lutuk tawh. Chutiang rorelna avang chuan hmasawnna a khairual thei loa, rorelna tha a awm thei lo,” a ti.
Danin awmzia a neih loh bakah inenkawlna leh inkaihhruaina mumal a awm lo tih sawiin, “A thei apiangte intih milenna huangah kan ram rorelna hi a awm a. Mi harsate dinhmun a chhe tual tual a, mi tlemte dinhmun a kang zel a, mi hausa leh rethei inkar a zau tulh tulh a, hemi siamtha tur hian mipui kan sawm a ni. Tun aia awmze nei zawk leh tha zawk kan beisei tur a ni a, chumi beiseitute chuan beiseina thar nen ZPM-a lawilut turin ka sawm a ni,” a ti.
Politics chu a pawimawh tih MLA hian a sawi a. Kohhran mi, sumdawng, contractor, zirlai, sawrkar hnathawk, awm mai mai pawh ni ila, politics chuan nitinin min ngheng tih a sawi. “Ram rorelna hmanrua a ni a, ram roreltu kan siamna hmanrua a ni. Kan ram dinhmun kan thlirin siamthat a ngai a. Chumi siamthat hna thawk tur chuan kan zavaiin mawh kan phur a, chutah chuan kan zavaiin kan ralbang thei lo. Politics tha ngaihtuah chungin, kan hma hun lo awm tura ngaihtuahna tha hmang turin mipui ka ngen a ni,” a ti.
Kan ramin chief minister tha, hruaitu tha a mamawh tih C Lalsawivunga hian a sawi a. Chief minister ni bawk, Finance minister ni bawk, party president ni bawk hruaina hnuaiah mipui kan kun a, kan mangang niin a sawi. Chumi lak ata talchhuak tur chuan vote hmangin roreltu tha siam a ngaih thu leh chief minister tha nei tura ngaihtuahna siam a tul thu a sawi bawk.