Thildang karah heroin

Burma atanga heroin tawlhruk chu thildang karah zeh a ni tih hmuhchhuah a ni.
May 27 zing dar 1.00 vel khan YMA New Capital Complex Branch duty-te chuan an huamchhungah heroin tlemte an man a, a kawltu phone an enfiahnaah heroin tih sawilang chiah siloa, inbiaknaah tam thak zawka Zokhawthar atanga Aizawla tawlhluh tum nia hria in, Central YMA hnuaia ruihhlo dotu CADS chuan an chhuizui a, thu an zawhfiahnaah Aizawl Power House hlui bula lirthei ding pakhatah heroin hi phurh niin an hre ta a ni.
Excise & Narcotics Department hnuaia Anti Narcotic Squad an hriattir hnu ah he lirthei hi hren a ni a, an enfiahnaah zikhlum ip chhungah heroin hawng 3, artui bawmah hawng 11 hmuh a ni. Ruihhlo thawntu hian Zokhawthar atang bawkin mattress Rs. 30000 man vel a rawn thawn tih hriat a ni bawk a. Mattress pawh hi enfiah niin, a thuina pawr chhete awm chu ringhlelin, mattress hi hawn a ni a, heroin hawng 110 hmuh belh leh a ni.