Thilthaah chuan sawrkar hmasa hmalakna kan chhunzawm zel – Dr R Lalthangliana

Sawrkar hmasa hmalakna sawrkar tharin an ngaihsak thin loh avangin hmalakna tam tak a khaihlak thin tih minister Dr R Lalthangliana chuan sawiin, MNF chuan thil tha turah chuan sawrkar hmasa hmalakna an chhunzawm zel tih a sawi.
Thawhtannia West Phailenga market building thar sak tur lungphum a phumnaah Commerce & Industries minister Dr R Lalthangliana chuan Mizorama a hmasa ber turin North Eastern Council sum hmanga market building tha tak sak a ni tur chu lawmawm a tih thu a sawi a. Sawrkar hmasa hmalakna sawrkar tharin an ngaihsak thin loh avangin thil tam takah hmalakna a khaihlak thin chu thil pawi tak a ni, tiin, “A bikin kum 10 danah sawrkar a inthlak thin a, sawrkar a inthlak hian hmalakna tam tak a thuanawp thin. MNF chuan thil tha turah chuan sawrkar hmasa hmalakna kan chhunzawm zel a ni,” a ti.
ZMC pawh Congress sawrkarin MBBS 100 zir nan an lo ruahman avangin tha an ti a, mi 500-in an zir ngei tur a ni, tia rilru siamin an bei a, nasa taka hma la in an chhunzawm ta a. Tunah chuan recognised an ni ta hial tih a sawi. “Sawrkar thenkhatin thil tha turah sawrkar hmasa hmalakna an chhunzawm lo thin kha thil pawi tak a ni,” a ti.
Covid chu India ram leh khawvel ram dangin an tawh vek a nih rualin, Mizoram chuan pul hrileng vanga vawk sing 6 chuang thihna, ramria buaina, khawchhak lama lirnghing avanga buaina, Myanmar, Bangladesh leh Manipur atanga raltlan tuamhlawm ngaite a awm tih MNF minister hian sawiin, “Sawrkar kal tawhten an hmachhawn ve loh kan hmachhawn nasa a, dinhmun harsaa kan awm hi Zoram mipuiin min hriatpui se, hriatlawk loh lamah budget-a awm lo sum tam tak a luangral a, hengte avanga kan tih tur kan tih lohah mipui hriatthiamna kan ngen. Chuti chungin he sawrkarah hian hmasawnna tam tak a thleng a ni,” a ti.
Market building New W. Phaileng hi NEC sum hmangin nuai 278.25 senga sak tur a ni a. Kumin August 22-a sak tan tur niin, 2025 August 22-a sak zawh tum a ni.