Thing phun enkawl zui lamah tan lak thar tum

Thing phun enkawl zui
lamah tan lak thar tum
Environment Forest & Climate Change department thing leh mau chereu tur venna atan thing tiak phun enkawl puitling tura tan lak thar a tum.
State Level Sub-Committee on Green Mizoram chu Thawhtanni khan an chairman, Environment Forest & Climate Change minister TJ Lalnuntluanga kaihhruaiin an thukhawm a. Nikuma ‘Green Mizoram Day’ hman dan thlirletin kumina awmze nei leh hlawhtling zawka hman dan tur an sawi ho.
EF&CC minister chuan Green Mizoram Day hman thin hian mipuiah rah tha a chhuah zel a beisei tih a sawi a. Mizoram thing leh mau, nungcha humhalha tihchangtlun kawngah mi thahnemngai tak tak an pung chho zel chu lawmawm a tih thu sawiin, thing leh mau chu mihring mamawh chi hrang hrang petu a nih avangin duat taka enkawl hna Forest deparment kuta dah mai loin mitinin kan mawhphurna a la a, theihtawp chhuah tlan a ngai tih a sawi.
“Sik leh sa danglam avangin khawvel pumin harsatna a tawk mek a, Mizoram ngei pawhin harsatna tam tak a tawk a, hei hi ramngaw tih chereu nasat vang niin harsatna lian zawk tawk lo tura ramngaw humhalh a ngai takzet tawh a ni,” a ti a. Mipui hnena zirtirna tha zawk thlen a nih theihna’n kumina Green Mizoram Day hman tur pawh awmze nei tak a, ngaihtuahna thar nen duan a ngai tih a sawi a ni.
Kumin Green Mizoram Day thupui atan “Thingphun ila, enkawl zui ang u” tih thlan a ni a. State level-ah chuan Green Mizoram Day programme hman tanna atan June 9 ruat niin, Sihphir Sakawrhmuituai tlanga hman tura tih a ni.
Kum kal tawhah thingtiak phun thinte chu a tet deuh thin avangin duh angin a nung khawchhuak zo lo fo a, a liansa deuh phun tawh nise, tiin an rel. Thingtiak phunte dam khawchhuah thatna’n, he Ni puala thingtiak la zawng zawngin an thingphunte an enkawl zui ngei ang, tih intiamkamna nena pekchhuah tum tawh a ni a, an thingphun nun zat report thehlut leh tura beisei an ni dawn a ni.
State level leh district level-a kangmei veng tha district leh khua lawmman pek thin chu chhunzawm nise tih niin, Aizawl district bikah ‘video clip’ hmanga inelna neih phalsak a ni. Green Mizoram Award chu pekchhuah tan tura rel niin, mimal leh pawl hnena pek tura ruahman a ni a, award dawng thei tura ‘nomination’ thehluh dan leh mipui hnena puanzar hna chu Forest Department kuta dah a ni.
Green Mizoram Day hi kum 1999 atanga hman tan a ni a, kumtin June 11-a hman thin a ni. Nikum Green Mizoram Day pualin thingtiak 19261 phun a nih bakah thingtiak 118540 semchhuah a ni.