January 30 khan Congress te chuan Jammu and Kashmir city a vur nasa tak tla chungin Bharat Jodo Yatra vawr tawp chhinchhiahna hun hmangin rally an nei a.
He rally hi Congress leaders Rahul Gandhi, Priyanka Gandhi Vadra leh party chief Mallikarjun Kharge te chuan Sher-e-Kashmir Cricket Stadium atanga tanin DMK, NC, PDP, CPI, RSP leh IUML party aiawh te pawhin an telpui a ni.
-- Advertisement --
He ‘padayatra’ hi January 29 khan Lal Chowk area-ah Rahul Gandhi chuan national flag pawt pharhin a lo khar tawh a, mahse, official anga kharna chu January 30 khan Srinagar-ah vur tla nasa tak hnuaiah neih a ni.
He mi ni chawhma lamah Gandhi chuan Panthachowk a ‘Bharat Jodo Yatra’ camp site-ah national flag pawhpharhna a nei bawk.
Congress president Kharge chuan party hrang hrang 20 chuang te Trinamool Congress (TMC), Janata Dal (United), Shiv Sena, Telugu Desam Party, National Conference (NC), Samajwadi Party, Bahujan Samaj Party, Communist Party of India (CPI), Communist Party of India (Marxist), Jharkhand Mukti Morcha, Rashtriya Janata Dal, Peoples Democratic Party (PDP), Nationalist Congress Party, Dravida Munnetra Kazhagam (DMK), Rashtriya Lok Dal, Indian Union Muslim League, Revolutionary Socialist Party leh Janata Dal (Secular) te chu kharna inkhawm hmanpui tur hian sawmna a thawn chhuak a ni.
He yatra hian State thahnem tak leh Union Territory pahnih paltlangin September 7, 2022 khan bul tan niin thla nga dawn lai neih a ni a.
Yatra neih chhungin Rahul Gandhi chuan public meeting tum 12 neiin corner meeting tum 100 chuang a nei a, press conference tum 13 a nei bawk a. Kal pahin mipui te nena inbiakna hun tum 275 neiin thuhova inkawmna mipuite nen tum 100 chuang a nei bawk.
January 29-a kharna press conference a neihah Rahul Gandhi chuan Bharat Jodo Yatra chu chhim atanga hmar pana kal an ni chungin ram pumah nghawng a nei tiin a sawi a, tunah chuan he ram hian vision dang duhthlan tur a pe a ni, tiin a sawi.