Thla 9 chhung atan Lyon coach Fonseca an hrem!

Thla 9 chhung atan Lyon coach Fonseca an hrem!
March ni 2 Ligue 1 match pakhata 2-1-a Brest FC an hneh tumin Olympique Lyonnais coach Paulo Fonseca chu referee Benoit Millot nen pawhthen chawt chawt ngai khawpin an inbakkaih a, Nilaini khan French Professional Football League (LFP) chuan hremna tarchhuakin, thla kaw chhung teh meuh atan phuar a ni!
Kum 52 mi Fonseca hi kumin November ni 30 thleng a pawlte inkhelh laiin bench-a thuin team a vil thei dawn lo a, officials’ dressing room reng rengah a luh khap a ni a, match khelh hma leh hnu lama official function-ah a tel ve a rem dawn lo bawk.
Hei bakah hian September ni 15 thleng chu team dressing room, pitch, tunnel leh corridor-ah a kal ve khapsak a ni.
Kha inkhelah khan France ram hmarthlang tuipui kam bial Brittany-a an lawngchawlhna khawpui Brest behchhan club chu Stade Brestois 29 khan penalty an beisei chu endik a nih hnuah penalty ham a ni lo a, kha boruakah khan Portuguese boss Fonseca hian referee a hnial nasat avangin straight red card hmanga hnawhbo a ni a, mahse, match official Millot laka a chet dan leh tawngkam chhakchhuah avang khan hremna lian zet a tawk zui ta a ni.
Millot chuan French sports newspaper L’Equipe hnenah thil awm dan sawiin, “Min rawn pan a, vau titih pahin min rawn tihthaih a tum a, straight red card ka pe a; min rawn tih dan kha a uchuak hle a, min rawn khawih duh mai hmel a pu a, a nihna takah chuan a lu hmanga min tauh tum ni khan a lang hial a; khatih lai khan penalty ka ham dawn lo tih pawh ka la lantir lo a, ka final decision ka la puang lo.
“A tawi zawnga sawiin a hnar khan min rawn si thuak hman a ni,” a ti.
Lyon coach Fonseca hlauhthawn angin referee Millot khan lehlam pawl kha penaty pawh a hlawhchhuahtir ta chuang lo a, khati tak maia Fonseca khawsa vak mai kha a hnuah amah pawh a inchhir a, a chet dan avangin thupha pawh a chawi ngei a, mahse, football manager tana hremna na mangkheng a pumpelh phah ta chuang lo a ni!
Referee khawih duh mai hmel puta a khawsak lai khan Lyon player thenkhatin Fonseca kha referee lak atangin an pawtsan a; hremna tarchhuah a nih hnuah Lyon chuan thuchhuah siamin, an head coach chunga hremna tla chu na lutuk deuh leh thutlukna siam hmanhmawh lutukah an puh.
Ligue 1 club thuchhuah chuan an manager chu a chet dan avanga tehna khai mai tur a nih loh thu leh referee tihnat tak tak tum loa a lungnona lanchhuahtir (emotional reaction) satliah mai a nih thu an sawi a, hremna khinlet theih dan awm thei zawng zawng an dap kim vek tur thu an tarlang tel.
Vawisarih lai French champion ni tawh Lyon hi Ligue 1 table-ah parukna ni mekin, Nizan Europa League result tarlan hman lohah FCSB an hmachhawn a; AC Milan a chhuahsan atanga thla khat hnu lek, January ni 31 maia an sengluh an head coach Fonseca tel loin match engemawzat an khelh a ngai dawn ta a ni.