Thla tharah health care bill pechhuak dawn – Health minister

Thla tharah health care bill
pechhuak dawn – Health minister
May thla hian health care bill ba tam zawk chuan sawrkarin pekchhuah a tum tih Health & Family Welfare minister Dr R Lalthangliana chuan a sawi.
Thawhtannia MNF office-a inkhawmah MNF adviser ni bawk Dr R Lalthangliana chuan healthcare bill cheng vaibelchhe 70 vel sawrkarin a bat chu thla tharah chuan budget-a vbch. 60 dah atangin engemawzat bill pekchhuah an beisei tih a sawi a. Asian Development Bank project an tifel a nih phei chuan healthcare bill tang awm tawh loin an chinfel vek theih tur thu a sawi.
MNF sawrkarin an hma amite thiltih an chhunzawm thin tih MNF minister hian a sawi a. Medical College pawh an hma amiten an hawng a, tha takin an chhunzawm a. Covid dedicated medical college ni chungin MBBS pass thar zaa 71 an nei chu thil ropui tak a ni tih a sawi.
An term chanve deuhthaw harsatnain a tlakbuak chungin, Health department hnuaiah post 700 chuang la turin an tifel hman a. Nunna chhan nana an sum hman, budget-a awm lo cheng nuai sing hnih a kai tih a sawi. Hma an la dawn chauh a, inthlanpui hmachhawn a hun leh ta mai chu pawi a tih thu a sawi bawk.
“Heti chung hian, kan sawrkar hma khan ZMC-ah khum 140 chauh a awm a, tunah khum 480 a awm ta. District zawng zawngah oxygen plant kan dah vek a. Civil Hospital Aizawl ICU 5 chauh awm kha, tunah naupang ICU telin 30 dawn kan nei tawh,” a ti.
Party thenkhat chuan felfai em emin, serafim anga sawrkarna din an tum a, hei hi a theih loh tih Dr R Lalthangliana hian a sawi. “Keini chuan kan fel loh ang angin mirethei kilkhawr ber thlengin, zu leh drugs-in a tihbuaite pawh kan enkawl zel ang,” a ti. Social media politics a buaithlak tih sawiin, “Sawrkar thiltih a chhe lai phochhuaka mipui ngaihdan tichiri zawnga thiltih hi tunhmain a awm ngai lo. Belhchian dawl si loa sawrkar tuma sawrkar beihna hi thil tha lo tak a ni,” a ti.