Thla tharah pawh hri vei hriat belh

Thla liam taah khan Mizoramah Covid-19 hri vei an awm nual a, thla tharah pawh hriat chhuah an la awm.
IDSP-in an chhinchhiah danin, September ni 2-ah mi pahnihin hri an vei tih hriatchhuah a ni a, ni 3-ah pakhat, ni 8-ah pakhat an awm. Tun thlaah hri vei hriat thar mi pali an awm tawh.
August thlaah khan Mizoramah mi 33-in hri an vei tih hriatchhuah a ni a, thla chawhma lamah hri vei zat hi a pung zual.
June leh July-ah khan hri vei hriatchhuah an awm lo a, August-a an pun hluai hnuah September-ah pawh hriat belh a ni ta zel rih.
Kuminah March thla atang khan hri vei hriat chhuah thar an awm zeuh zeuh a, May-ah phei chuan a pung hluai. March thlaah khan mi pathumin hri an vei a, April-ah mi 40-in, May-ah mi 57-in an vei. June leh July-ah hri vei hriatchhuah an awm lo a, August-ah mi 33-in an vei.
Nikumah khan mi 40-in hri an vei a, kuminah September ni 8 thlengin mi 137-in hri an vei tawh. Nikum nena khaikhinin kuminah hri vei zat a tam a, mahse hri a hluar tihnaah mithiamte chuan an ngai chuang lo. Covid-19 hi Mizoramah a awm ngheh tawh avangin, rawn lang fo tura ngaih sa a ni an ti.
IDSP-in an chhinchhiah danin, Mizoamah sample 19,99,204 endik a ni tawh a, mi 2,39,815-in hri an vei tawh. Vanduaithlak takin mi 734-in nunna an chan phah tawh.