Thla thumah mi 1878 man hman
CADS-in khar khatah mi 50 man
Ruihtheih thil kaihhnawihah Excise & Narcotics chuan tunhnai thla thum chhungin mi 1878 an man a. Central YMA hnuaia ruihhlo dotu Central Anti Drugs Squad pawhin kar kalta chhung khan mi 50 an man.
Kumin January atanga March inkar khan Excise & Narcotics Deparment (END) chuan heroin kg. 15.192 an man a; methamphetamine kg. 44.111, crystal meth kg. 48.061, ganja kg.84.913 bakah ruihna atana hman damdawi tui leh a mum engemawzat an man.
Hemi chhung vek hian rakzu litre 18013.980, zu bilh lai tin 52198, a senchi (IMLF) um puitling 4453, a chanve um leh quarter bur um 700 chuang, beer leh ramdang siam zu leh BEDC an man nual bawk.
Heng ruihtheih thil an man kawihhnawihah hian mi 1878 an man a, a phurhna atana hman lirthei 43 an man bawk.
Central YMA hnuaia ruihhlo dotu Central Anti Drugs Squad hian April 6-11 chhung khan heroin hawng 3 leh tictac bura dah 123, ruihna atana hman damdawi dang mum 300 chuang leh ganja, rakzu leh a senchi an man a; heng kaihhnawihah hian mi 50 manin, mi 2 chu Excise & Narcotics kutah an hlan a, counselling class pek mi 15 an awm bawk.
Hetihlai hian Inrinni zing dar 8.00 vel khan Lawngtlai district-a Siachangkawn khaw daiah YLA Siachangkawn Branch, Mizoram Police leh 20 Assam Rifles chuan methamphetamine mum 180000 an man.
Thudawn danin, Siachangkawn khaw daiah hian bike MZ-03 A 0350 an enfiahnaah he bike-a chuang Phunthawng (42), Lungrang Halkha district Myanmar, tuna New Siaha East-II a khawsa nia inchhal hnen atangin methamphetamine hi an man a ni a, kg 17.946 a rit a ni.
The Aizawl Post-in a lo chhuizui tawh danin, methamphetamine/ crystal meth hi Mizoram chhungah chuan tun thlengin ti sawi tham an la awm loa, a kalkawngah Mizoram hi a tang rih mai nia hriat a ni.
Thla thumah mi 1878 man hman CADS-in khar khatah mi 50 man
Get real time updates directly on you device, subscribe now.