Thlai rate sawi turin ngen

ZPM sawrkarah chuan a rate hresa in kuthnathawktuten thlai an ching tawh dawn tia an sawi angin, nakumah sawhthing leh hmunphiah kg ah cheng engzatin nge an lei dawn tih sawi tawh turin sawrkar an ngen tih Congress hruaitu PC Laltlansanga chuan a sawi.
Zirtawpnia Congress Bhavan-a inkhawmah MPCC general secretary PC Laltlansanga hian, ZPM sawrkarah chuan a rate hresa in kuthnathawktuten thlai an ching tawh ang, an ti thin a. Kum 2025-ah hian sawhthing leh hmunphiah kg khat cheng engzatin nge kuthnathawkten an hralh dawn, tih sawrkar an zawt tih a sawi a. An intiam angin kuthnathawktute chu nakuma sawhthing leh hmuhphiah rate tur hrilh an phut tih a sawi.
Mizo thalai eizawnna mumal neilo harsatna tawk thahnem tak awm mekte hip nan ZPM hotuten ZPM a sawrkar chuan Zoram Development Bank an din anga, loan a pung awm loin thalaite bul tanna tur an pe anga, sawrkar chu guarantor-ah a tang ang, tiin an inzuar a. An intiamna avang khan ZPM sawrkar hi thalaiten beiseina sang tak nen an thlir tih a sawi. “An intiam angin engtikah nge Zoram Development Bank an din anga, a pung awmloa loan an pek hun tur Mizo thalaiten kan zawt a ni,” a ti.
Kan education-in thiamna tak tak min pe em tih ngaihtuah a ngaih thu leh MA, MSc kan tihte leh mithiam tam tak nia kan ngaihten an degree phu tawk hnathawh tur an hmu lo tih MPCC general secretary hian a sawi a. Mizorama political party tinten thalaiten hnathawh tur an hmuh theihna tura policy duan a hun tawh a. Education pawh siamtha a, chhawr tlak leh hnathawk tak tak thei tur thiamna pe tura education siamthat a ngai tih a sawi a ni.