Thlai thar lei

Congress hruaitu pakhat chuan thlai thar hralh chungchangah, ZPM sawrkar chu inrawlh tam lutuk, thangthat lak tum luatah kuthnathawktuten harsatna an tawh phah mek niin a sawi a. Tunhmain hralhchhuahna lamah harsatna an tawk ngai lo; sawrkar a inrawlh hnuah hmunphiah hralh a buai a, contractor an puh leh then a… tiin a sawi a.
Eng pawh ni se, sawrkar hi kuthnathawktute thali tharchhuah leisak tumin a inbuatsaih mek a ni a, ruahmanna siam chhungin kum khat chu a han liam ve leh ta poh chu a ni a. Sawrkar hmasa ten NLUP leh SEDP an buaipui dan nen khan a inzul chho viau dawn ni maw!
Hmunphiah lei chungchangah contractor mawhpuhna kan hmu tawh a, minimum support price chungchangah hun bituk siam a han ni leh a. Election campaign laia ‘cheng sawmngain kan lei ang’ tih liam mai kha a lo ni mai lova, eng eng dan tesep emaw ni a piang chho leh ta mek chu a ni ber.
Sawhthing bikah hian, February thla chho vel hi zuartu leh leitute an indawr runpui tur a nih hmel a, leitu lam hian cheng sawmnga aia to deuh chauha an nawr chiam mai te pawh thil hlauhawm tak a ni. Kum danga sawhthing rate kalphungah chuan February-March chho velah hian Kg-ah cheng za chuang ten sawhthing chingtuten an tiral thin nia hriat a ni a. Kuminah pawh hian chutiang chu beisei a nih mek laiin, sawhthing chingtu tam tak hi chu an thaw dep dep niin a lang.
Hetih lai hian, minimum support price ringawt hi sawrkar emaw thlai chingtute emaw hian kan atchilhin kan buaipui reng mai ang tih a hlauhawm a. Kuthnathawktute thlai tharchhuah sawngbawlna leh vawnthatna lam hi uar taka kan bawhzui tur zawk niin a lang. Thlai thar vawnthatna leh sawngbawlna kan neih that chuan, minimum support price tih vel hi chu kan sawi peih meuh lovang. Hmasawnna tur tha pawh hi ‘election oriented’ a kan kalpuii chiam thin avangin hma kan sawn thei lo chu a ni ber awm asin.