Aus Open draw: Djokovic vs Alcaraz

Australian Open-a intum tur tarchhuah takah champion thei tura rinkai lian pahnih Novak Djokovic leh third seed Carlos Alcaraz-te chu lo chak chho zel ta se quarter-final lamah an intum thei dawn a, tum emaw zawk zawk chuan mellung ropui phun an tumna an puitlin zo lo tihna a ni dawn!
A record kawl lai belhchhaha Australian Open title 11 lak tlin tum Djokovic hi kumin Melbourne Park-a a champion leh chuan tennis player piangchhuak tawh zawng zawng zinga Grand Slam singles title 25 hlawhchhuak tling hmasaber leh awmchhun a ni dawn a; chutih laiin Spaniard Alcaraz hi a champion ve thung a nih chuan a career-ah major title hrang thiau pali a sualchhuah kimna a nih dawn bakah major title pali la kim vek thei naupang ber a ni thei dawn.
Hmachhawp hraw takin a delh mek Djokovic chuan US wildcard Nishesh Basavareddy hmachhawn chungin bul a tan dawn a; semi-final thlen hmaa a hmachhawn tur enin a beiseina kawng hi a mam purh dawn lo tih a chiang!
Third round a thlen chuan Djokovic hian tunkar warm-up tournament pakhat Brisbane International-a a ngam loh big-serving American Reilly Opelka ngei mai kha a hmachhawn leh thei dawn a, Opelka nen an intum leh a nih chuan hei ngawt pawh hi er fe tham a tling dawn a, Brisbane phuba a la thei a nih pawhin champion tum ruh ve tak tur Alcaraz sut leh theihna ‘chance’ a nei run!
Spaniard Alcaraz thung chuan a Grand Slam title la hawn loh awmchhun a beisei lehna kawnga a hna hmasaberah Alexander Shevchenko a tum dawn a, hei chu harsatna nei loa paltlang thei tura beisei a ni phawt rih.
Rinkai dang Jannik Sinner chuan Australian Open title a kawl lai humhim tura a chetchhuah vawikhatna turah Nicolas Jarry a tum thung ang.
World number one Sinner hi kum 2019 khan a vawikhatna’n big-hitting Chilean Jarry nen hian intawngin, a tlawm zawkah a tang a; nikum khan China Open-ah Italian hian Jarry hnehin phuba a la ve thung a, Melbourne-ah hian chak zawk tur sawilawk mai theih loh zingah an pahnih intum tur hi a tel a rinawm!
Australia innghahna tur Nick Kyrgios chuan dulthuar na avanga a talbuai reng hnuah Melbourne Park-ah a inlan dawn a, Jacob Fearnley nen first round-ah an intum ang.
2022 Wimbledon final-a Djokovic a hneh loh hnu khan khelmual chhung leh pawna chanchin chhia nei ve deuh reng Kyrgios hi hliamin a tibuai chho ve ta reng a, tuntum tournament-ah pawh hian a inlan thei ngei dawn em tih a la chiang lo.
Australian dang Alex de Minaur pawhin nikum US Open-a Alcaraz dangbettu Dutchman Botic van de Zandschulp a tum hmasaber dawn a, draw hautak a ni.
Nimina Melbourne Park draw-ah hmeichhe singles defending champion Aryna Sabalenka chuan 2017 US Open winner Sloane Stephens a tum dawn a; women’s second seed Iga Swiatek tum hmasakber tur chu Katerina Siniakova niin, American third seed Coco Gauff chuan chona lian a hmachhawn nghal dawn a, first round-a a sut tur a chipui Sofia Kenin hi kum 2020 Australian Open champion a ni a, Gauff tan hnehsa khelha khelh a rem lo ang!
Nikuma runner-up leh Paris Olympics gold medalist ni bawk Zheng Qinwen chuan first round-ah qualifier a tum dawn a, an chak chhoh zel chuan Sabalenka nen quarter-final stage-ah an intum thei dawn.
Melbourne-a vawihnih champion tawh Naomi Osaka chuan nikum first round-a a hneh loh Frenchwoman Caroline Garcia bawk a su hmasaber leh dawn a; Japanese player hian straight sets hmanga a hneh loh lakah phuba a beisei dawn a, nau neih avanga hun rei tak a chawlh hnuah Australian Open title pathumna a beisei leh dawn a ni.