Thlai thar leiah mipui tihbeidawn kan tum lo – Agriculture minister

Thlai thar leiah mipui tihbeidawn kan tum lo
– Agriculture minister
Thlai thlan bik pali lei kawngah ZPM sawrkarin mipui tih beidawn a tum loa, hetiang a nih lai hian mi thenkhat chuan thlai thar lei thei lo se an duh emaw tih turin an chang reng tih Agriculture minister PC Vanlalruata chuan a sawi.
Thawhtannia ZPM party office-a inkhawmah State Marketing Board chairman ni bawk PC Vanlalruata chuan, campaign laia an lo aupui tawh angin thlai thar lei turin Pu Lalduhoma kaihruai ZPM ministry a inbuatsaih mek a, mipui tih beidawn an tum lo tih a sawi.
Thlai pali – sawhthing, aieng, hmarcha leh hmunphiah lei tura din Marketing Board chuan chak takin hma an la mek a, tunhnaia International Conclave cum Buyer Seller Meet an buatsaihah India ram bakah ram hrang hrang atangin thlai thar ngaihventu an lo pungkhawm a, Pathian zarah hmalakna a kaltluang hle tih a sawi.
“Hetiang a nih mek lai hian, mi thenkhat chuan thlaithar hi lei thei lo ila, mualpho takin sawrkar hi awm se an duh emaw tih mai turin min chang reng a, nimahse, sawrkarin thlai thar hi kan lei ngei dawn a, mipui tihbeidawn kan tum lo,” a ti.
Tunah hian district tinah Agriculture Marketing Committee an din tawh a, khaw tinah society 800 dawn an din tawh bawk tih PC Vanlalruata hian a sawi a. Sawhthing leh aieng hi January atanga May thleng sawrkarin a buaipui dawn a, hmunphiah leh hmarcha bikah January – March chhung sawrkarin a market a buaipui dawn tih a sawi. “Sawrkar thar chuan thlai thar lei leh hralh chungchangah mumal taka kalpui a tum a ni,” a ti.
State Marketing Board chairman sawi thenkhat:
8 Khaw tina society din chu Primary Collection Centre-a puan an ni dawn a, sawrkar buaipui ngai kher loa thlai thlan bik pali-ah anmahnia auction an lo tih ve theih chuan sawrkar inrawlh kher loin society-in an hralh dawn.
8 Sawrkar rate anga leisaktu an hmuh loh chuan Secondary Collection khaw 45 an puan tawhah an rawn hralh dawn a ni.
8 Primary Collection Centre atanga Secondary Collection Centre thleng thlai thar phurh man hi society-in an lo buaipui ve dawn a ni.
8 Hmun hnih – Sihphir leh Melthuma thlai thar chhekkhawlna, wholesale market din tuma hma lak phawt a ni dawn a. A intahtawl zelin thlai thar dahthatna tur leh wholesale-na tur hmun an buatsaih bawk.
8 Mamit leh Kolasib district-ah buhhum lei tumin sawrkar a inbuatsaih mek.