Thlai thar thawn dan tur buaipui
Delhi-a cham mek adviser to chief minister (Hand Holding) Dr KC Lalmalsawmzauva chuan Thawhtanni leh Thawhlehni khan sawrkar laipui hotute dawrin thlai thar thawnchhuah dan tur leh sawhthing hralhna kawnga ruahman dan tur a sawipui.
Railway minister V Sommanna hnenah Mizoram thlai tharte rel hmanga man tlawm zawka thawn chhuah a nih theih nan rawtna a thlen a. Minister hian sawrkar laipui scheme pawimawh tak, Kisan Train a tawp tak avangin Mizoram thlai tharte chu Bairabi atanga parcel van hmanga phai lama thawn theih a beisei tih a lo hrilh.
Civil Aviation minister Murlidhar Mohol chu thlai leh thei chhe awlsam chi thlawhna hmanga man tlawm zawka thawn chhuah theih nan rawtna a thlen a. Chief minister DO letter a hlan nghal. Civil Aviation minister bakah Civil Aviation ministry-a secretary Vumlunmang Vualnam a hmu bawk. Krishi Udhan scheme 2.0 tangkai zawka kalpui a nih theih dan tur leh Lengpui Airport kaltlanga Mizoram thlai leh thei tharchhuah chhe hma chite thawn chhuah zung zung theih dan tur an sawi dun a ni.
Thlai thar thawnchhuah lama hma latu lian, APEDA chairman Abhishek Dev chu Mizoramin sawhthing tam tak a thar dawn avanga hralhna market lama harsatna awm thei leh a sutkian dan tur a sawipui a. APEDA chairman hian sawhthing processing atan Common Facility Centre tur rawtna chu tha a tih thu sawiin, DPR thehlut turin a lo rawn. Thlai thar leituten Mizoram an hmelhriat theih nan leh market tha tak a awm theih nan adviser to CM-in Buyer – Seller Meet neih an duh thu a sawi chu kumin November vela neih a nih theih nan hma la turin a staff-te Mizorama a rawn tirh tur thu a sawi a ni.
Protector General of Emigrants (Overseas Employee) joint secretary S. Bhaghat pawh a hmu a. Handholding policy hnuaia Mizo thalaiten ramdanga eizawnna mumal zawk an neih theihna tura pawimawh tak, Protection General of Emigrants office Aizawla hawng ve turin a ngen. Joint secretary hian Mizoram sawrkarin office lian vak lo (space) an pek theih chuan a tul anga bawhzui a lo tiam a. Adviser to CM hian a tul anga chief minister a lo sawipui tur thu a hrilh.