Thlasik a hnai, NCR-ah bawlhhlawh khuahkhirhna kalpui tan

India-ah thlasik boruak a intan hnai a, boruak bawlhhlawh hun lai ber thleng leh turah hian sorkar laipui hnuaia viltu, Commission for Air Quality Management (CAQM) chuan Delhi leh National Capital Region (NCR)-ah inkhuahkhirhna, GRAP-1 a kalpui leh tan.
CAQM hian Thawhlehni khan thutlukna hi puangin Delhi-a boruak bawlhhlawh dan (Air Quality Index) chu 211 a ni a, ‘chhia’ huang a ni phak tih an sawi.
Sub-Committee on GRAP-in Central Pollution Control Board (CPCB) chhinchhiah dan leh India Meteorological Department (IMD) leh Indian Institute of Tropical Meteorology (IITM)-in khaw awm dan tur an thlirnaah inkhuahkhirhna nep ber chi hi kalpui tul an ti a ni.
“AQI hi ‘chhia’ huangah a awm leh tawh a, khaw awm dan tur thlirin a aia chhe zawk thleng thuai thei tur a ni,” tiin committee chuan thupek an chhuah a. Tun thlasika GRAP khuahkhirhna kalpui hmasak ber a ni.
Stage-I (boruak chhia, AQI 201-300) khuahkhirhna hi Delhi bakah Uttar Pradesh, Haryana, Rajasthan leh Punjab-a NCR district-ah kalpui a ni ang.
Khuahkhirhna hnuaiah hian in saknaah thawktute chu thil tikhu thei venna lova thawh phal an ni lo va, hna thawhna hmunah tui phuh vek bawk tur a ni.
Thil siamna hmunten boruak bawlhhlawh an tihchhuah dan endik tur a ni a, CNG hmang vantlang inkalpawhna hmanrua a tam thei ang ber hman tur a ni. Bawlhhlawh hal khap a ni a. Lirthei lian chi, khu dum tichhuak nasa endik tur a ni a, Delhi atanga km 10 huam china power plant-te chu natural gas vek hman tur a ni bawk.
Khuahkhirhna thupekah hian dan zawm a ni em tih uluk taka en tur leh agency hrang hrangte chu AQI-in ‘chhe hle’ leh ‘chhe tak’ huang a luh loh nana veng turin tih an ni.
Mipuite pawh GRAP Stage-I Citizen Charter zawm tura tiin mahni lirthei lek chhuak lova vantlang intawm hman te, tlai lam lun laia pawna exercise la lo turin ngen an ni.
Khualrel thiamte chuan khuahkhirhna kalpui hma a ni chu tha an ti a, chutih rual chuan siam that tur a awm tih an sawi a. “GRAP hi band-aid chauh a ni a, lo hal thunun leh thenawm state nena thawhhona lo chuan boruak bawlhhlawh hi a awm tho dawn,” tiin Centre for Science & Environment (CSE) Executive Director Dr Anumita Roychowdhury chuan a sawi.
IITM-in a chhut lawk dan chuan karleha thli leh van thiang takah bawlhhlawh a tang dawn a, thla tawpah chuan AQI chu 250 chuang a ni dawn a. September kha a thianghlim viau a; mahse, Diwali hnuah Delhi-a AQI hi a sang ziah.
Nikum thlasikah khan ni 50 chuang boruak bawlhhlawh ‘hlauhawm tak’ a awm a, hriselna leh eibarin a tuar em em a ni.