Aia upa zahna tlahniam hi ka vei – Jeje Lalpekhlua

Thangtharte, a bikin zirlai naupangteah aia upa zahna a tlahniam ta lutuk chu a vei hle tih MLA Jeje Lalpekhlua chuan a sawi.
Nilainia Lammuala MISA -MFA Inter School Football Tournament 2025 kharna a hmanpuinaah MLA Jeje Lalpekhlua chuan, tunlaia thangtharte nuna a vei em em, a bikin zirlai naupangah aia upa zahna a tlahniam hle tih a sawi a. Zirlai naupang kalkhawm chuan aia upate zahna chawinung chunga an zirna kawnga hmasawnna hmu ngei tura taimaa thawkrim turin a chah tih a sawi.
Hriselna kawngah Mizoram kan hniam hle, tiin, zirna leh infiamna kawng hrang hranga hlawhtling tur chuan hriselna dah pawimawh a tul tih a sawi. “Infiamna hi damdawi tha tak a ni a, zirlaiten infiamna kawnga kan talent neih tipungin, hlawhtlinna tak tak nei turin kan tumah kan chian a ngai a ni,” a ti.
MISA-MFA Inter School Football Tournament kharnaah hian higher secondary boys final khelh a ni a. St. Joseph HSS leh Golden Harvest HSS intumin hun pangngaiah si thum ve ve khungin an in hnehtawk a; hun pek belhah Golden Harvest HSS hian si hnih khung belhin, 5-3 in an chak a ni.