Thlasik boruakah ‘Cruel Summer’ a la HOT ber

Thlasik boruakah ‘Cruel Summer’ a la HOT ber
2019-a tlangzarh tawh Taylor Swift hla, Eras Tour a neih atanga rawn lar thar leh ta ‘Cruel Summer’ chu Billboard Hot 100 (singles) chart-ah No.1 a ni a, he chart-a kar hnih a No.1-na a ni ta. He hla hi 2019-a a album ‘Lover’ ami kha niin, kumina Eras Tour a neihah a sa lar thar leh a, single angin a tichhuak thar leh bawk a, tunah hian Streaming Songs chart leh Radio Songs-ah pawh No.1 a ni a, Krismas hla ni loah chuan Streaming Songs-a No.1 ni tura hun duh rei ber niin, an tlangzarh atanga kum li hnuah he chart-ah hian No.1 a kai chauh a ni.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Cruel Summer’ hi October ni 20-26 chhungin US-ah stream maktaduai 21.3 leh download sales 7,000 tlingin, radio airplay-ah pawh ngaithlatu maktaduai 80.1 a la nei thei a, hei hi a kar hnih nan Hot 100 chart-ah a No.1 pui leh ta a ni.
Chart No.1 hlui Doja Cat ‘Paint the Town Red’ chu No.2-ah bawk awm lehin, SZA ‘Snooze’ pawh No.3 a la ni a, Zach Bryan ‘I Remember Everything’ featuring Kacey Musgrave chu No.6 atangin No.4-ah a insawn a, Luke Combs ‘Fast Car’ chu No.7 atangin No.5 a kai thar leh a, chart No.1 hlui Morgan Wallen ‘Last Night’ chu No.9 atangin No.6-ah a insawn lehin, Wallen hla dang, chart No.1 pawh lo kai tawh ‘Thinkin’ Bout Me’ chu No.10 atangin No.7-ah a insawn thar leh ta bawk.
Drake ‘IDGAF’ featuring Yeat chu No.4 atangin No.8-ah a tawlh a, Bad Bunny ‘Monaco’ chu No.5 atangin No.9-ah a tawlh a, Gunna ;Fukumean’ chu No.11 atangin No.10 a kai thar ve leh thung.

‘1989 (Taylor’s Version)’ hralh a kal

Taylor Swift sawi takah chuan a album hlui a record thar, ‘1989 (Taylor’s Version)’ chu ralh a kal hle a, ni thum chhungin US-ah ringawt copy 5,50,000 chuang an hralh tling der tawh mai a, kumin bikah chuan kar khat chhunga album hralh tam theih ber dawttu a ni nghal der tawh a, ni li dang an zawrh leh hnuah phei chuan kumina kar khat chhunga album hralh hnem theih ber a ni pha hialin a rinawm.
He album hi October ni 27 a tlangzarh kha niin, October ni 29 thlengin US-ah 5,50,000 an hralh tling tawh a, chung zingah 3,70,000 chu album tak tak hralhna niin a dang chu he album-a hla stream-na atanga album hralhna tlukpui (on-demand official stream maktaduai 220 chuang) a ni ve thung.
Kumina kar khat chhunga US-a hralh hnem theih ber chu Taylor Swift re-recorded album tho ‘Speak Now (Taylor’s Version)’ niin, he album hi an tlangzarh atanga kar khat chhungin US-ah 7,16,000 an hralh thei a, he record hi ‘1989 (Taylor’s Version)’ hian a rawn khum thei maiin a rinawm.
‘1989 (Taylor’s Version)’ hi karleh Billboard 200 (albums) chart-ah a No.1 dawn a tih a chiang tawh a, Swift album he chart-a No.1 kai thei 13-na a ni ang a, hmeichhe zaithiam zinga Billboard 200 chart-a No.1 kai thei album ngah ber a nihna a sawhnghet leh sauh dawn a ni.
Taylor Swift hian 2008-a a album pahnihna ‘Fearless’ a tlangzarh atang khan a album tlangzarh tawh zawng zawng 12 te chu Billboard 200 chart-ah No.1 an la kai vek a, ‘1989 (Taylor’s Version)’ hi a 13-na tur a ni a, a album hmasa ber ‘Taylor Swift’ chu 2006 khan a tlangzarh a, Billboard 200 chart-ah No.8 a kai thei a, a album tlangzarh zinga chart No.1 kai lo awm chhun a la ni.