Thlasik khua a vawt tan e

November thla chawhnu lam a ni tawh a, khua pawh a vawt tan. Vawt tak chu a ni lo a, mahse inthuam lum ve deuh a ngai tawh.
Kar hmasa tawp lam atang khan khua hi a vawt ta deuh a, Nilaini-ah ruah tlem azawng a tla a, khua a vawt deuh surh bawk.
State Meteorological Centre chhinchhiahnaa a lan danin, tun thlaah November ni 18 khan a vawh ber laiin 16°C a hawlh a, hei hi tun thlaa a vawh ber lai a ni rih.
November ni 3-ah khan a lum ber laiin 29°C a hawlh a, hei tun thlaa a lum ber lai a la ni. Ni 4, ni 10 leh ni 13-ahte 27°C a ni bawk. 29°C hi a sang lo.
November ni 20 thlenga kumina khaw vawh ber lai chu January ni 12 kha a ni a, khami ni khan a tehnaa a hniam ber laiin 10°C a kawk. Kuminah 10°C aia hniamah a la awm lo.
Tun thlaah hian ruah a tla zeuh zeuh a, tam tham chuan a la sur lo, mahse tlem azawng han tlak tum a awm zeuh zeuh. Mahse thlasikah chuan ruah tlem azawng pawhin khua a tivawt sawt thei.
State Meteorological Centre chhinchhiahnaa a lan danin, ni 2-ah mm 0.2 a tla a, ni 5, ni 6 leh ni 15-ah te mm 0.2 a tla bawk. Mm 0.2 hi tihtham a ni lo. ni 8-ah khan mm 2.8 a tla a, ni 20 khan mm 1.4 a tla bawk.
Kuminah kum tir atangin khua a vawt vak lo a, khua a uap thin. Mizoram lum ber hun hi April leh May vel a nih thin laiin kuminah chuan September ni 22 khan 33°C a kai a, hei hi November ni 20 thlenga Mizoram lum ber lai a la ni. Degree Celcius (°C) lama a san vak loh pawhin khua a lum uap thin a, kuminah favang khaw thian hunah pawh khua hi a la uap. Chuvangin, mithiamte sawi danin, khua a lum mar avangin tlema a vawh deuhin khaw lum tuar thang mihringin vawt an ti hma a, tun thlaah pawh hian 16°C vel a nihin mihringin vawt an ti ang.
Mizoram hmun thenkhatah ruah a la sur rih dawn tiin khawchin thlirtute’n an hmu a, Inrinni thleng hian hmun hrang hrangah ruah a la tla dawn an ti.