Thlawhna taxi: Singapore-in a hmang thei tep ta

Singapore-ah pawh traffic jam an buaipui a, a tihreh dan tur leh tihziaawm dan tur an dap nasa. An dap chhuah tak chu vantlangin a hman theih tur, khawpui chhunga service tur thlawhna a ni.
Hetiang thlawhna, khalhtu ngai lo chi (driverless hover-taxi) an tih hi an hmang thei hnai ta hle a. A siamtu, German aviation firm chuan Singapore khawpuiah enchhin thuai a ni dawn tih an sawi.
Mihring chen tamna, Asia ramah hian khawpui lian tin deuhthaw hi traffic jam-in a tibuai a. Ni tin mi sang tam tak chu an buai phah a, tih dan kawng nasa taka dap a ni thin a, he thil hi ngaihtuah chhuah a ni ta a ni.
Khawpui changkang, Singapore-ah chuan technology thar hmanga siam, khawpui mil tur a duang chhuak a. German firm pakhat, Volocopter chuan he thul hi siamin Singapore sorkar kaihhruaina hnuaiah en chhin thuai theih an inring tih an sawi a ni.
Volocopter an tih hi electric air taxi a ni dawn a, helicopter pian ang deuhva duan niin a thlawh chhuah dawnin ngil takin a dinna zawnah a kang thei a, a tum dawn pawhin chutiang bawkin ngil takin a tum thei.
Drone technology hmanga duan a ni a, mi pahnih chuan theihna a ni a, vawi khatah kilometre 30 vela hla a thlawk thei tih an firm chuan an sawi a. Dubai-ah pawh hlawhtling takin an lo enchhin tawh bawk a ni.
“Volocopter hi khawpui chhunga hman atan liau liauva duan a ni,” tiin Volocopter chuan thu an chhuah a. A chung vir pawh a lian lo va, hei hi khawpuia in sang tak tak karah pawh thlawh tibuai lo thei tura duan a nihna a ni a, a chuan a nuamin a hahdam bawk tih an sawi.
“Metre 100 vela sang (feet 330)-ah a thlawk thei a, hnuai lam khawpui ri bengchheng hriat phak lohna chin vel a ni dawn a ni,” an ti bawk.
Company thupuangtu chuan Volocopter hi pilot-in joystick hmang emaw, lei lam atangin remote hmanga thunun theih a nih thu a sawi.
Volocopter enchhin hi a hlawhtlin chuan tam zawk siam turin an company hi Singapore-ah an inbun zui dawn niin a sawi bawk