Thlawhtheihna Coy lar Air India Airways Rs 50,000 chawitir thu

On Oct 10, 2025 3 0

Lallunghnema
Charity Lodge
Cont: 9862288182

Tunlaia Mizo mipui titi tam ber nia lang chu Goods & Service Tax kalphung thar chungchang hi a ni a. Mipui nghawng a nih avangin a pawimawh em em a ni; mipui ka tih hi consumer-te an ni. He thil thar hi consumer leh sumdawngte hmakhua a ni a. Tax chawi a tlem chuan thil man pawh a thla hniam ve tur a ni Sumdawng thenkhatin stock hlui leh stock thar chungchangah an lo buai ve chiam ringawt hi anmahni hmâ an sialzia an tihlanna mai mai a ni. Thu tling a ni lo. He GST hi Mizoram mai ni lo, India ram pumpuia hman tur a nih avangin a pawimawh leh zual a ni. Sum lakluh dan danglam dawrh dawrh thei, income tam phahna tura ngaih a ni a. Dan ang taka a kal theih chuan Sawrkar tan pawh thâwk huaina tham a tling ngei ang. Sawrkar SUM HNAR tihpunna tur a nih avangin. He Policy thar hi a hlawhtlinna chu Sawrkar kutah chauh a innghat lova, mipui leh thil zuartute kutah thui tak a innghat a. Sumdawng leh Service hralhtute kutah a innghat bawk. Mipui hian, a bikin Consumer-ten chhiah kan chawi ber a. Chu kan chhiah chawi chu indirect tax niin sumdawng hovin sawrkarah min chhun luhsak thin a ni a. Sumdawng pek leh chawi ni lovin Consumer-te chawi a ni. Chhiah pek hi kan duty a ni bawk.
Chhiah kan pek that chuan consumer-te tana malsawmna, chhiah pek that loh erawh chuan consumer-te tana tuarna a ni tih hriat a ngai. Chhiah pe lo, pawisa la lut si tam tak an awm. Hengte hian chhiah pek hi anmahni tan tho a ni tih hi lo hre mawlh rawh se.
Kan thupuiah kan lût tawh ang.
Hetiang hi thil awm dan chu a ni. Kum 2019 October-ah khan Advocate lar tak Dr Subramanyam Swamy chu Himachal Pradesh University-a zirlaite hmaa thusawi tura sâwm a ni a. Delhi to Shimla flight ticket dar 7:50 a thlawk chhuak tura tih niin ticket – ah pawh chuan flight timing chu 7:50 a.m tih a ni a. Ticket laksaktu hi Rohit Bhagwat a ni a. Dr Swamy chuan a hun taka thlâwk hman turin thlamuang takin Airport chu a pan a. Mahse, hrilhhai thlak takin Air India flight timing chu 6:50 a.m ah sawn hma sak a lo niin an lo thlawh chhuahsan daih mai a! Hetianga flight schedule tihdanglam thu hi an hriattir miah lo a ni. A hrilhhaithlâk ngawt ang le!
Dr Swamy hian air ticket dang a la leh ta ringawt a. Pawisa chu a lêt lawih a chawi belh bâkah nasa takin a rilru hliamsak a ni a. A thinrim thlak hle ang le. Tichuan, Subramanyam Swamy chuan Air India hnenah a lungawi loh thu a hrilh a. Mahse, Air India Airways chuan chhuanlam siamin hemi tuma passenger dang tu mahin an complaint lo tiin flight timing sawn hma chu tha taka zawmin an flight schedule sawnah chuan tlai an awm lo, tiin a complaint chu an lo chhang a ni. Ani, Dr Swamy hi lungawi lo tur a ni bik lo ve, chuvangin Air India mawhphurhna a ni lo, tiin a complaint chu an lo hnawlsak a.
Dr Swamy lungawi lo hian District Consumer Commission hnenah complaint thehlutin a khing (sued) a. District Consumer Court chuan Dr Swamy hian air ticket a lei lova, a tan buaina tur a awm lo. Consumer a ni thei lo tiin Rohit Bhagwat-a chu ticket leitu a ni, tiin District Consumer Commission chuan he complaint hi a lo hnawlsak a ni.
Dr Subramanyam Swamy chuan Delhi State Consumer Commission hnenah Rohit Bhagwat hmingin appeal a thehlut a. State Consumer Commission chuan ngun taka a ngaihtuah hnuin Air India chu Rs 50,000 a chawitir ta a ni. A chhan chu Dr Swamy hi flight ticket leitu ni lo mah se, sum sengtu leh a tuartu chu amah hi a ni a. Consumer a nih angin dikna leh chanvo a nei a ni tiin State Consumer Commission chuan thutlukna a lo siam ta a. District Consumer Disputes Redressal Commission judgement hnawlsakin Complainant chu thiam chantirin Rs 50,000/-(Rupees fifty thousand) only thlawhtheihna company chu a chawitir ta a ni.
Hetiang hian Consumer Advocacy Group International WhatsApp Group – ah report a ni a. “Consumer Commission Orders Air India To Pay Compensation For Not Informing Change in Dr Subramanyam Swamy’s Flight Timing” .
Cause Title : Rohit Bhagwat V. Air India Airways.
Service : Verdictum
https : // search. app / aMBRb(2019/25)
Kum 2 vel kal taah khan kan thianpa fanu hian hetiang deuh hian harsatna a tawk a. Aizawl – Kolkata Flight chu phone hmang ringawtin an lo sawn hma sak a. Flight chu a nang ta lo va. Harsatna a tawk nasa hle a ni. Sum tam tak a hloh phah a. Mahse, an harsatna hi sawi fel ngai chi deuh a ni a. Kan umzui dan ka hre ta lova. Mizoramah hian mipui hian ngaihsamna lian tak kan nei a. Kan ngaih a sam em em a. Neih nei mang si lo hian kan inren thiam lem lova, kan pawk hle bawk thin a ni. Kan ni tin thil tihnaahte hian fimkhur a, uluk tur kan nih hi hriat fo a tul tthin a ni.
Consumer kan nih anga kan Dikna leh Chanvo-te hi kan sual chhuah a tul tawh takzet zet a ni. Sumdawnna khawvelah hian (Dawrtu) Consumer – te hi an hlu ber a. Consumer mi vil te phei chu Customer is king of Consumer te pawh an lo ti hial a ni. Kan sawi thin tawh angin Customer tamna apiangah sumdawnna a hlawhtling thin a. Air India – te pawh hian hetiang ram economy nghawng thil ang chi hi an pal zut ngam lo thin a ni. Tun tum case-ah pawh hian khualzinte hi an tan an pawimawh tih hi hai (unaware) thei an ni lova. Khualzin an neih tam chuan Thlawhtheihna Company hlawhtling an ni mai dawn a. Passenger-te laka that chhuah chu an mawhpurhna a ni tih an hriat a, an dah pawimawh a ngai hle reng a ni.
Mizoramah hian Airport pakhat kan nei ve a. He Airport hmangtute hian Consumer an ni tih hi inhre chiang se,dikna leh chanvo ropui tak an nei tih pawh inhre mawlh rawh se. Mahni dikna leh chanvo pawh hre lo mi huaisen a nih theih loh. Consumer right hre lo politician, Consumer a nih leh nih loh pawh inhre lo Kohhran Upa leh Ram hruaitu, sawrkar officer, zai thiam, mi thiam kan tih te hi he Mizoram riang têah hian an va tam em! I veivahna velah thil i lei a, bus-ah i chuang a, taxi i hmang a; restaurant-ah i kal a. I duh ang i hmu em? I lungawi em? Harsatna i neih chuan Centre For Consumer Education hrilh rawh, inthlahrung suh.
A tâwpna atan hei hi lo vawng teh hram aw, in tangkaipui dawn em asin!
Consumer thufing 10-te:
1. Thil i leiin hlohnaah ngai suh.
2. I mamawh bâk lei suh.
3. I châk avangin lei kher suh.
4. Lei khâwl ai chuan hâwp khawp lei a tha zâwk.
5. Pawisa ken tlêm chuan hman a tlêm nge nge.
6. Mamawh chuang liam lei hi mahni inrawkna a ni.
7. I bun tâwk lei la, i hâk tâwk lei rawh.
8. Thil zuartu dikin mi a bum ngai lo.
9. Smart Consumer a tlanchhe ngai lo.
10. Chhungkaw budget siam hi consumer fing tihdan a ni.
Ka’n ti leh hrâm teh ang U Kung, tukin zing october ni 7 chu ni chhuak a mawiin khua a nuam hle a. Kei erawh ka awm a nawm loh deuh avangin Zing tawngtai inkhawmnaah ka kal ve ta lova. Mahse, ka tho hmâ tho mai. Ka tih dan pangngaiin ka fâwn ka han chuh nghal a. Consumer Whatsapp gr. ka han en a. Heng consumer thufingte hi ka han phuah ta mawlh nawlh a. Lo tangkaipui in awm tâkin tih thûah ka rawn zep leh ngawt pek a nih hi!