Thli thawk tharin LA ram kang a tinung thar mek

Thli thawk tharin LA ram kang a tinung thar mek
Mi 25 thih tawhna, Los Angeles-a ram kang mek chu thli na tak thawk thar lehin thil a tibuaithlak thar leh mek a, mi hausa tawntaw leh Hollywood star rualte chenna in nen in sang tel a kang chhe mek zel.
National Weather Service chuan Santa Ana thli, darkar khata km 110 vela chak thlengin Los Angeles-ah hian a tleh dawn tih an sawi a, hei hian ram kang mek chu a tihnun thar leh bakah chak zawka a inman kaitir a rinawm hle tih an sawi.
Khawchin sawi lawktute chuan mi chengte chu an chhehvela thil thleng thlithlai ngun tur leh insaseng a tul pawha che chhuak nghal thei tura inring turin an ti a. Los Angeles leh Ventura county-te chuan ‘dinhmun khirh tak’ an hmachhawn mek tih an sawi.
Mi thiamte chuan heng lai vela thlai leh thing dingte chu a ro em em a, meiin a kang kai kai awlsam tih an sawi a. Kangmei hian Pacific Palisades-ah ringawt pawh ram acre 24,000-a zau kang chhe tawhin Altadena-ah acre 14,000 chuang a kang tawh bawk.
Eaton leh Palisades fire-te hi nasa takin a la kang mek zel a, tunah hian California chhim lam chanchina ram kang thil tichhe nasa ber leh a dawttu an ni tawh.
Eaton fire-ah hian mi 17 vel thi tawhin Palisades fire-ah mi pariat an thi tawh bawk a. A hmaa mi thih tamna ber chu kum 2003-a Cedar Fire kha a ni.
Los Angeles fire chief Anthony Marrone chuan hlauhawm thar awm leh tur atan an inbuatsaih tih a sawi a. “Eaton fire huam chhungah hian water system pawh kan endik a, a tha vek a, tui leh a phuhna chu kan nei tihna a ni,” a ti.
Thli thaw hian kangmei a timan kai chak chauh a ni lo va, meikhu leh meivap a tileng nasa a, hei hi hriselna atana pawi thei a ni a. Mi tin chu hmai tuam turin an ti a, hriselna lam thuneitute chuan meivap hian thawkna leh taksa peng dang a tibuai thei tih an sawi.
California state-a ram kang hi sorkar laipui pawhin a chhui tan ta a, social media-ah a kan chhan nia rin hrang hrang pawh a darh nasa hle a. A chhan lian ni thei zingah power line chat, hal, rampalailenga mei tuah te rin a ni.
Ram kang avang hian mi 88,000 velin chenna an neih loh phah tawh a. An chenna in kang chhe ve ta lo tam tak pawhan la kir thei chuang lo bawk a. AccuWeather chuan thil kang chhe hlut zawng hi a lo berah $ tluklehding 250 atanga 275 inkar tal ni tawh turah an ngai.