Thlipui tuar puihna volleyball inkhel lian

Mizoram Voleyball Lovers (MVL) buatsaih khuarel chhiatna tuarte tanpuina tur Volleyball Charity Match for Cyclone Remal Victims chu zanin hian R. Dengthuama Indoor Stadium, Mualpuiah khelh a ni dawn ta a; iknhel hmuhnawm en tur a awm dawn bakah zaithiam zai ngaihthlak tur a awm dawn bawk a, LPS leh Zonet lamin live-in an pechhuak dawn a ni.
Ticket hi Rs. 50 man siam a ni a, dawr hrang hrang RAW Digital (Zarkawt), VL Ralte Store (Treasury Bus Stand), PISGAH Automobile (Bawngkawn Lunglei Road) leh Unique Creation Salon & Spa (Kulikawn)-ahte lei theih a nih bakah a hmunah lei tur a awm bawk ang.
Gate hi tlai dar 5-ah hawn tan a ni ang a, dar 5:30-ah Comedian/YouTuber leh celebrity-te an innuai nghal ang. Dar 6-ah tunlai zaithiam lar zai ngaihthlak tur a awm zui bawk dawn a ni. Dar 8-ah chuan main event tan a ni tawh ang a, All Star Team leh North East Olympic Volleyball Champion-te’n Mizoram mipui hmaah inkhel hmuhnawm an chhawpchhuak tawh ang.
An ti mai mai dawn lo
Mizoram tana NE Games-a gold medal beng chhuaktute hi an chhe thut dawn lo a, an combination a buai thut dawn lo. Chutiang bawkin anmahni ang thoa volleyball vanga tlang hriat, All Star Team hming putute hian gold awrhtute hi hneh loh an tum dawn lo. An ti mai mai dawn lo a, inkhel duhthusam, hmuhnawm leh mit titlai min hlui ngei ngei dawn.
Coach pahnih leh manager-te hi han thlir la, an naute hi an theihna sang ber phochhuak turin a karin an karchhuak ngei ang le!
Aizawlah i awm a, ‘volleyball ka ngaina’ i ti a nih chuan a hmunah ngei en rawh, i inchhir lo ang. A hmunah i en lo a nih chuan volleyball ka ngaina ti vawi tam mah la, tuma’n an uksak peih lo ang che! Mi mangang leh harsatna tawk, chhiat tawkte tanpuina tur ni mah se game pui tak en turin inring tawp mai rawh le.
North East Games zawh taka Mizoram game kha in mitthla let thei em? 7sister zingah Valbuanga hup zo reng an awm lohzia kha i la theihnghilh hman ka ring lo.
Langsar vut si loa Fabian-a game hmuhnawmziate kha nimin ang maiin mitthlaah a la cham asin…
Lalmama hi spiker-te tana ball vawrh turin zirtir hran a ngai tawh lo. A ball vawrhte chu keini, pa santha satliah pawhin net chunga dar lawr zawk khawpa zuangin, a lo dawngtute hnap dawk zawkin kan vuak per thei ang chu maw le!
Khingpui spiker thate ball vuak hup thla tura Zosangzuala te, |pa te, Zodinga leh Nunfela teho theihna zozaite kha ennawm en nin theih loh zuk ni ngawt a!
Lawmmanin a um emaw tih mai tur Biakmuana ni se, ani tluka duhthlan tur chuang an awm lo tih mai tur a ni a; Hriatpuiate lah ngaihtuahawm an ni si lo. A hmaah ball har a awm thei lo a, ball a hlah thei lo emaw tih mai turin Rinngheta defence a hmuhnawm leh dawn. A che vel zangkhai hah reng mai Sadrak Fanai khel hi a ennawm thin asin!
Mizoram Olympic Team-te thatzia hi inhrilh chiam ngai lo mah se anni ho lo dolet tura All Star Team tana rawn khel turte hi palliam mai mai chi an ni hauh lo.
PVL khelh zawh taka best spiker lawmman dawngtu, Khawhai tlangval Zomuansanga leh Khawbel ruak hnawhkhattu satliah a nih lohzia chetziaa pholangtu Johan Vanneihsangate turuzia hi sawi zui chiam ngai a ni lo.
Anni tluka hmuhnawm Saidingpuia Sailo a la awm cheu!
Saitea zuan sanzia leh ball vuak thiamzia hi i la chiang lo a nih chuan zanin hian R. Dengthuama Hall pan mai rawh.
Captain cool Bawiha Sailo hoin, Thangmina te, Mapuia Ralte leh Vanlalmawia, Josepha teho hian arbawm an tah mai mai dawn lo a, engemaw thial chap chap paha Hnehpuia chesual duh miah lo te, nulate star rawn Ramhluna ball vuakna sanziate hi lo ennawn rawh aw…
Libero sawi apianga tlar hmasa luahtu Hmingsanga hi lehlam pawl tana a ngeiawmzia mitin kan hmu fo. Hmuh nawn leh a chakawm asin.
Setter tha duhthlang tur ni ila thum vawr mai ka duhna tur thiau mai Davida, C-Tea leh Kimate hian lu an ti hai. A ruala luhtir vek theih an ni dawn si lo. A hmunah ngei en a chi ang… – PC Lala