Thu Leh Hla Kutpui hmang
Mizo Writers Association (MWA) chuan July 21 khan Aizawlah Foundation Day & Thu Leh Hla Kutpui 2023 a hmang.
He hun hmanpuitu Art & Culture minister R Lalzirliana chuan thuziak chu hnam min phuarkhawmtu leh tingnungtu pawimawh tak a nih thu sawiin, “Hnam chanchin min zirtir bakah hnam anga kan nun kaihruaitu pawimawh tak a ni. Literature hi ramri in a dan ve loh avangin khawvel hmun hrang hranga chengte pawh phuarkhawm theitu a ni,” a ti.
Tunlai khawvelah thalaite zingah novel siam a, thu leh hlaa tui an awm thin chu a lawmawm viau laiin, literature ngaihsakna a tlahniam anga a lan thu R Lalzirliana hian a sawi a. Ziak leh chhiar lama tui leh ngaihtuahna puitling, rilru zau leh fing tak chu thil kalkawp leh inhmeh tak a ni tih a sawi.
Ziakmite chu ram leh hnam a tha zawnga kaihruaitu pawimawh tak an ni tih minister hian a sawi a. Khawvelah hnam chimrala awmte chuan tawng (language) an chan hmasa ber thin tih a nih thu sawiin, hnam humhalhna’n tawng humhalh a pawimawh bakah hnam inpumkhatna atan a pawimawh tih a sawi a ni.
MWA buatsaih 2023 Mizo Literary Award chu Dr LN Tluanga leh Prof RL Thanmawia te hnenah hlan a ni a. BA Mizo Honours subject-a hmu sang ber hnena an hlan thin R Buchhawna Proficiency Prize chu Lalremtluanga Pachuau, Faith College Zarkawt Aizawl atanga pass chhuak hnenah hlan a ni bawk.
Mizo Writers Association hi 1977 July 23-a din a ni a. Mizo tawng lehlin lehkhabu tha ber (Translation Book Award) an thlan thin bakah Mizo Proficiency Prize an sem thin. Mizo Proficiency Prize hi kum 2008 atanga hlan tan niin, prize palia then a ni a. HSLC exam-a Mizo subject-a hmu sang ber hnena hlan thin ‘Ch Pasena Proficiency Prize’; HSSLC exam-a Mizo subject-a hmu sang ber hnena hlan ‘Lalmama Proficiency Prize’; BA Mizo Honours subject-a a hmu sang ber hnena hlan ‘R Buchhawna Proficiency Prize’; MA Mizo subject-a hmu sang ber hnena hlan ‘J Malsawma Proficiency Prize’ te a ni. Chawimawina thuziak leh sumfai Rs. 5000 hlan thin an ni a, lawmman hi proficiency prize hmingputu chhungkuain an tum thin a ni.