Thu tiam mai mai hi sim a ngai – Vanlalhmuaka

Thu tiam mai mai hi sim a ngai
– Vanlalhmuaka
Naupang a nih lai, lehkha a zirlaia hnam hnuaihnung a nih vanga enhran leh harsatna tam tak tuar chhuaka India ram danpui dintu leh mi ropui tak Dr BR Ambedkar ang chu Mizoten kan neih ve theihnan hma sawn a ngai a, thu sawi mai mai leh thu tiam mai mai ang chi pawh sim a ngai tih BJP Mizoram president Vanlalhmuaka chuan a sawi.
BJP Mizoram hian Thawhlehni khan an office-ah India ram Constitution neih leh hman mekin kum 75 a tlin lawmna, ‘Constitution Day’ pualin hun an hmang a. State president Vanlalhmuaka chuan Dr BR Ambedkar chu India ram tana danpui tha leh hnam zawng zawng huapzo, tumah thlei bik nei loa kim taka dan siamtu a ni tih a sawi. Lehkha a zir laiin hnam hnuaihnung a nih vanga zirna ina thut an phal loh pawha tukverh atanga en leh ngaithla hram hram chunga zir chawp ni mah se, ‘Father of the Constitution’ tih hming pu hial kan nei chu kan vannei hle tih a sawi a ni.
“Hindu hnam tha hoten an hmuhsit leh khawih pawh an khawih duh loh hial nichungin, India tana dan pawimawh ber siamchhuahna atana sulsutu pawimawh a ni ta a, vawiinah hian harsatna tam tak tawk chunga a tawrhna chu Mizoram tribal tante, India ram tan ngei pawh malsawmna a lo ni ta a ni,” a ti.
Mizo zingah hetiang taka ram tana mi ropui hi engtikah nge kan neih ve ang, tih chu rilru ah a awm tih BJP Mizoram hruaitu hian a sawi a. Pathianin Mizote nasa takin mal min sawm a, malsawmna kan hmuh chu chhiar dan kan thiam a, kan rinawm phawt chuan sang takah kan awm thei tih a sawi.
“Mizote hi hnam anga hma kan sawnna turte, ram anga hma kan sawnna turte ngunthluk taka kan ngaihtuah a ngai a; thu sawi mai maite, thu tiam mai maite, kan tih leh theih si loha tawng mai maite hi kan sim a, Pathian duh dana ram kan kaihhruai a pawimawh hle,” a ti.