Thumvawr hmangin chak

February 12-a local council leh village council inthlanah thumvawr hmanga chak mi pathum an awm.
Aizawl Municipal Corporation huamchhunga Model Vengah LC seat 5 awmin, Congress-in general seat 2 an la a, MNF-in general seat khat leh reserved seat khat an chang. General seat khat la awmah ZPM leh Congress candidate vote hmuh zat (394) a inang a, returning officer hriatpuina in thumvawr hmanga lak niin, ZPM candidate hi vannei zawkah a tang a, tlinga puan a ni.
Hei vang hian party mala sawrkarna siam thei an awm lo a ni.
Chaltlangah pawh thumvawr hmanga tling a awm a. LC seat 7 awmnaah ZPM-in general seat 6 a la a, reserved seat-ah Congress-in seat khat a la. General seat atanga tling ZPM candidate zinga vote hmu hniam ber chuan vote 1176 a hmu a, tling zo ta lo zing ami Congress candidate chuan vote 1175 a hmu a ni. Congress party hian vote chhiar nawn an dil angin, chhiar that a ni a, vote 1175 ve ve an hmu. Thum vawr hmangin tling tur zawn a ni a, Congress candidate zawk hi vanneiin, ZPM-in seat 5 an la a, Congress-in seat 2 an la ta a ni.
Champhai district Tualcheng khuaa seat pathum awmah general seat-ah MNF leh ZPM candidate an chak a, reserved seat-ah ZPM leh Congress candidate-in vote 128 ve ve an hmu. Thumvawr hmangin a tling zawk tur zawn a ni a, Congress candidate hi vannei zawkah tlangin, party mala sawrkarna siam thei an awm ta lo a ni.