By Rosangzela, Vh
Ph: 8974138026
-- Advertisement --
Eptu pawl zar mipuiin kan zo na
Kumin chu kan lo thlirlawk leh nghahhlelh ang reng tak MLA inthlan kan hmachhawn dawn ta a, kum 2018 ah khan mipui lamin MNF Party chu an hotupa Pu Zoramthanga hovin sorkar kan siamtir a. Beseina sangtak nen kan thlir a, Pu Rama dinhmun kan ngaihtuahin Minister leh MLA fang mithiamtak tak a ngah a, kan beisei pawh a sang hle a ni. Inthlan au hla nuaithum sem mawlh mai kha mipuiin chilthli far duah duahin kan thlir a; nuaithum hi a tlem lo va, mirethei tan a hlut dan a sang lehzual. Sorkar kalsiam a awlsam nan nge Party Worker hmaisei chin chanvo in thei sem nan Board hrang hrang an din thliah thluah a, heng board te hi tha viau tura ngaih a nih laiin tul lova sum khawhralna mai mai a lo ni zui ta a ni. Mizo mipui hi kan tha a, party lamin sorkar an siam duh avanga dawt hmanga min bum pawhin kan chhuzui lutuk lo; nuaithum sem chungchang pawh kan ngawihpui mai mai a, nuaithum aiah thlai chi thum khat an sem pawhin kan ngawi mai mai a, sawrkar sumtuakna atana mipuiah sum chawina kawng hrang hrang an siamin kan ngawi mai mai a, sawrkar thiltih danah kawngzawh hnan awm tak a awm pawhin kan ngawi mai mai a. Eptu Party lamin thawm an han neih chhoh takah chuan mipui lam pawh benharhin kan awm ve ta a. Eptu lam an chak dan azirin mipuiin sawrkar chet kan ngaihvenin kan umzui a ni.
Pu Rama sorkarin a chhuanlam lian ber chu covid a ni a, covid avanga buainain hmasawnna sum rawn lut tur a ti thuanawp tih a ni. He chhuanlam hi mipui chuan kan pawmpui mai a, kan hrethiam em em a ni; mahse, eptu lam bawk rawn au lehin sum luh dan te, a hman dan te an rawn au chhuahpui leh a, mipui lam kan harh leh sawng sawng a. Sorkar inrelbawl dan leh sum chetvel dan hi mimir hriatfiah theih pawh a ni lova, tunlai khawvel hmasawnna zarah an kalphung hi chu a then a zar chu kan hre ve thei a ni. Chipchiar zawka hre duh tan RTI hman tur a awm tih hre mah ila, kan taimakna hian a tlin lo nge han inchhui chiam hi kan hreh zawk? RTI lam hi kan hmang uar lo hle. Mipui lamin sorkar chu rethei leh leiba ngah em em a kan ngaih laiin an duhna hmunah sum tam tak sengin hma an la tho a. Hetiang thil a thlen lai pawhin mipui lam chu kan ngawi duk a, eptu pawl lam bawk rawn au lehin sum harsat lai a tul lo taka sum hman dan te an rawn tarlang a. Mipui kan harh leh ta a. Airport Cute ber CM-in a atchilh dan te eptute zarah kan lo hria a, chutiang zelin.
Sorkar sum hmuhna leh hmanralna te, a sum ruahmanna te chu mi nazawngin kan hriatthiam loh turin an tlangzarh a, budget chungchang hi kan harhpui tawh viau laiin a zira zir tham a nih miau avangin mipui lam tan hriatfiah a har. Mithiam ni a inngai ten an rawn ziak a, sawrkar tawngkamin an rawn tarlang a mi nawlpui chu kan bo tual tual a ni. Tunhma deuh a kan sawi fo thin chu, vairamah chuan Union Budget an sawiho laiin chawhmeh bazar (sobji bazar ) ah te chuan, purun zuar te, alu zuar te adt. chuan an radio-ah ngun takin an ngaithla thin tih hi. Purun man sang tur emaw tlahniam tur emaw an ngaihven hle a, chutiangin sumdawnna kawng hrang hrang buaipuitute pawhin an ngaihven hle a ni. Mizo mipuite hi hetiang lamah chuan state budget kan ngaihven dan a la pawnlawi viau a, chik zawka ngaihven chu sawitham emaw chauh kan ni ngei ang. Eptu lamin Pu Rama budget pharh an au chhuahpui a, mipui chanvo tlemzia leh kut hnathawktute tana innghahna tlak a nih loh dan kan lo hria a, chutiang zelin mipui lamin harhna kan lo chang thin a ni. State budget chungchanga mipui harhna hi Biak In chhunga harhna aiin ramin a chhawr zawk awm e.
Kum 2022 khan mipui chet chhuahna khawvel ram hrang hrangah kan hmu a, Europe lamah France, Britain, Germany, Hungary, Czech Republic, Belgium adt. ah te mipui nawrh huaihawtna kan hmu a. Muslim ram Iran lamah pawh mipui lungawilohna kan hmuin hetiang lam chanchin hi kan hre nasa hle. India ramah ngei hian mipui chetchhuahna chhinchhiahtlak leh ram nghawng dawt dawt sawitur a tam ang, Swadeshi Movement 1905, Satyagraha, Save Silent Valley Movement 1973, Chipko Movement 1973, Namantar Adolan 1978, Jungle Bachao Andolan 1980s, Narmada Bachao Andolan 1985, Jan Lokpalbill – Anti corruption movement 2011, Nirbhaya Movement 2012 adt. Democracy ram mipui chuan khawih buai lova kal reng tura ngaih kan nei chung chu “ Ram himna, zalenna, dikna, mipui chanvo, rorelna dik “ adt.. Mizoramah ngei pawh mipui hian ram hmasawnna kan duh a, kan sawi nasain khawikipah pawh titi bera kan neih a ni. Chutih rual chuan mipui hian ram rorelna kailawnah kawng pawimawh ber luahtu kan nihna hi kan ngaihlu thiamlo hle. Sum hmanga lei theih ang lekah kan inngai a ni, a pawi ngawt mai. Ram hrang hrang kan thlirin an ram roreltute thutlukna mipuiin an thlir reng a, a tul ang zelin an che chhuak ngam a ni. Kan ramah hian Eptu party te bengchhen dan azirin sorkar kal dan kan lo hre thin, eptu party lam an ngawih hmak chuan sorkar diklohna kan sepui ruah tawrh ngawt ngawt mai a ni. Mipui hi i harh ang u, engtin nge ni ang? Engti zawngin nge kan harh ang ? A chhanna chu kan hria. Kumin kum tawp lamah kan chhang fel turah i ngai ang u.