North Atlantic tuipuiah Titanic lawng kehchhe tawh zirchiang tura kal tuihnuai lawng chu Pathianni atang khan a chin hriatloh a nih avangin nasa takin zawn hna thawh mek a ni.
He research vessel hi Polar Prince tih niin tui hnuaia a luh hnu atanga darkar khat leh minute 45 hnu velah biak pawh theihin a awm lo va. US Coast Guard te chuan he submarine hian darkar 70 atanga 96 vel chauh daih oxygen a keng tiin an sawi.
Tour firm OceanGate te chuan him taka an letleh theih nan theihtawp an chhuah thu sawiin government agency te pawhin rescue operation hi an pui nghal bawk.
Polar Price hian Pathianni zing khan Atlantic Ocean a Titanic kehchhiatna hmun a thleng tih hriat a ni.
Search operation hi Boston Coast Guard ten kalpui mekin lawng chhungah hian mi panga an chuang a ni.
Titan submersible hi a chin hriatloha a awm lai hian Cape of God coast atangin 900 miles velah a awm mek nia ngaih a ni.
US Coast Guard hotu Rear Admiral John Mauger chuan tuipui hnuai mawng hla taka chhanchhuah hna thawh chu thil hautak tawp tiin a sawi.
Zawn hna hi kawng hniha thawh niin Titan hi Ocean surface ah a lo lang em tih hriat tum a ni bawk a, mahse, a pawi lai ber chu biak pawh theiha an awm lo chu a ni a, a dang leh chu tuihnuaia sonar search an tih hmanga zawn a ni.
Coast Guard te chuan C-130 Hercules aircraft chu tuipuiah a lang em tih enfiah turin an tir a, Canadian C-130 leh sonar capabiloity nei tel P8 aircraft te tirhluh tel an ni bawk.
Rear Admiral John Mauger chuan lawng chu tui hnuaiah hmuh a nih chuan chhanchhuak tur pawhin tanpuina an mamawh ngei dawna US navy leh private sector te an pun a ngaih tur thu a sawi bawk.
Polar Prince neitu Horizon Maritime te chuan lawng pahnihna Horizon Artic tih chu zawng tura an tirhchhuah mek tawh thu a sawi bawk.
-- Advertisement --
Tu te nge chuang?
Titan a chuang panga zingah hian British businessman leh explorer Hamish Harding te, British businessman Shahzada Dawood leh a fapa Suleman Dawood te pawh an tel a.
Nikum June thla khan Harding hian he lawngah hian a chuan ve tur thu sawiin Harding hi Action Aviation chairman niin Dubai, United Arab Emirates a hmun nei an ni.
Sub in eng nge a tih a, khawiah nge Titanic a awm?
OceanGate Expedition ah hian a chuang te chuan man chu $250,000 lawih niin ni riat chhung zinin Titanic lawng keh chhia an fang a, Titanic lawng kha Atlantic tuipuia 3,800m a thukah a awm a ni.
Chu chu Newfoundland coast atanga 600km laia thuk niin a hmun thleng tur hian full dive pawhin darkar riat tal hun ngaia ngaih a ni a.
Expedition khat hian ni riat zel a awh niin OceanGate te chuan an sawi a, Titanic kehchhia zirchian pah zela kal niin kum 2021 khan a tum khat nan an zuk tlawh pawh tawh a ni.
Eng nge thleng thei?
Subamarine expert Prof Alistair Greig, University College London chuan harsatna a tawh chuan emergency a thlen hunah ‘drog weight’ tiin tuipui pawnlanga lang thei turin chet a la thei a ti a.
“Communication emaw power failure a awm a nih chuan chu chu a tihdan tur niin tuipui pawn langah chhanchhuah theih turin a inhlang chho thei a ni” tiin a sawi.
Chu lo thil dang awm leh chu putru a awmin a ni a ti a, chu erawh thil duhawm lo tak a ni thung tiin a sawi a. Amaha tuipui pawnlang lama a chhoh theih tawh lohva tuipui mawnga a awm tawh a nih chuan duhawmlo tak a ni tiin a sawi.
Lawng chu a la kehchhe lo mai thei a, mahse 200m aia thuka a awm anih chuan harsatna nasa tak tawk dawnin navy submarine rescue te tan pawh chutianga thuka awm chu chhanchhuah ngaihna a vang ang a ti bawk.
Titan chu?
He lawng Titan tih hi mi panga chuan theihna leh 4,000 metres a thuk three knots- 3.5 miles per hour a kal thei a ni a. Titanic chhia en nana hman mai bakah survey leh inspection bakah research leh data collection atana hman thin a ni bawk.
Titan hi tunlai thiamna sang ber ber hmnga thuam niin lighting leh sonar navigation sysem te bakah 4K video leh photographic hmanrua leh bungrua tha tak tak te a keng tel a ni.