UPSC leh Mizoram

UPSC buatsaiha India rama sawrkar hna lakna sang ber Civil Services Exam-a a hmatawng paltlangtu Mizo thalai 13 te chu Mizoram Youth Commissions-in theihtawp chhuaha a puih tur thu tunhnai khan MYC Chairman-in a puangzar a.
UPSC Mains exam thei tura Mizoram thalai heti zat an tling hi a lawmawm hle a. Mains exam thei tur hian mi nuai 13 vel an inel a, Mizoram thalai 13 an tling a; nuai khat zingah Mizo pakhat zel tling ang pawhin a chhut theih awm e; chu chu a theuneu lo hle a ni.
CSE 2022-ah khan main paltlang thei Mizoram atangin mi pahnih an awm a, vanduaithlak takin interview stage an paltlang ta lo va, a lehpekah chuan an hlawhtlin ngei a beiseiawm lehzual a ni.
Tun tuma CSE-a hlawhtlingte zingah khan vawi tam tak exam hmachhawn hnua hlawhtling ta chauh thahnem tak an awm a. Hetah tak hian YMA thupui, ‘teirei peih’ a pawimawhzia a lo lang a, chu chu hlawhtlinna hmu tate thuvawn a ni tih pawh a chiang hle bawk.
Mizoram atangin Civil Services Exam-a tling thei kan awm loh rei tak avangin mawhpuh tur kan zawng ruai hlawm a. Chung zinga langsar tak pakhat chu, ‘education system her rem a ngai’ tih hi a ni awm e. Engemaw chenah kan education system hi chu her rem hret hret tur a awm tih phat rual a ni lo, chutih rual chuan, education system mumal lo zawk hnuaia zir chhuak, All India Services-a inhlangkai thei thahnem tak kan mi hmasate zingah khan an awm tih chu a takin kan hmu a, hmanlai mi leh tunlai mite hi tum tak takna kan inneih thuk hleih deuh a ni thei mai ang em tih pawh ngaihtuah theih tak a ni.
A nihna takah chuan, kan education system a changtlung tial tial a, a zirchhuak lam hi a ler lamah kan hniam hret hret zawk em ni chu aw a tih theih awm e. Kan hniam zawk anga a lanna hi a quality lam aimah hian duh tak takna leh tum ruhna tak tak (determination) kan tlakchham tak vang a ni thei bawk. Helai hi mithiamten survey/research te hi kalpui se, systematic deuh zawka hma kan lak hi a pawimawh ta niin a lang.