Tlabung-in zirtirtu dang zel Hnam hrang hrang inthurual

On Jun 9, 2025 8 0

Tlabung-in zirtirtu dang zel
Hnam hrang hrang inthurual
Tlabung school atanga sawrkarin hmun danga sawnchhuah a tum dana lungawilo, Tlabung khawtlang chuan zirtirtu sawnchhuah chhuak tur chu chatlak awm loin an dan chhunzawm zel a, vawiin – June 9 hian inhawrkhawm that leh an tum.
The Aizawl Post-a tarlan tawh angin Tlabung Govt. High School-a casual teacher pakhat chu Lawngtlai district Lungtian khuaa Modern High School-ah sawn a ni a, kumin May 30 khan transfer order a chhuak. Lungtian school-a zirtirtu pakhat hi Aizawla sawn a ni a, chumi thlakna tur chu Lungtian lam hian sawrkar an phut a, Tlabung-a zirtirtu hi a chet phah ta nia ngaih theih a ni. Hei hi Tlabung khawtlang chuan an duh lo hle a, khaw dang tih lawmna atana hman an ni fo mai chu an kham tawh hle tih sawiin, transfer order hi cancel turin sawrkar an phut a ni.
Tlabung Govt. H/S atanga zirtirtu chhuak tur hi an dang a, zanah pawh an dang zel a; Pathianni ah pawh, Tlabung-a Kristian sakhaw be lo, sakhaw dang bia/ hnam dang pawl ho nen inremsiamin, hunbi tukin a dan hna hi an inthawhchhawk tih thu dawn a ni.
Tlabung-ah hian Mizo bakah Chakma an tam a, Hindu sakhaw biate intelkhawmna, Pahari hnam intelkhawmna pawl a awm bawk. Heng mite hi a inchhawkin Pathianni-ah an duty a, vawiin – Thawhtanni hian Joint Village Council leh All NGO Committee Tlabung chuan sawrkarin an ngenna an tihhlawhtlin sak loh avangin, zirtirtu chhuak tur dan bakah Govt. High School Tlabung school inhawng /kal tur dan an tum tih an sawi a ni.
Hetihlai hian Joint Coordination Committee Lungtian chuan Modern High School Lungtian mathematics zirtirtu chu Govt Aizawl High School-ah sawn a ni a, May 31 ralhmaa sawrkarin transfer order a sut lo a nih pawhin a aiawh regular maths teacher pe tura an phutna chu tun thlengin chhanna an dawng lo tih an sawi a. Hei hi khawtlang mipui zahlohna leh zirlaite hmakhaw ngaih lohna lian takah an ngai tih an sawi.
Lungawiloh lantirna atan June 10&11 ah he school-a zirtirtu leh zirlaite school kal tur an dang dawn a, hei hian awmzia a neih loh chuan June 12 atangin tiamchin awmloin BRTF kawng dan an tum tih an lo sawi lawk ve tawh bawk.