Tlabungin Aizawlah lungawiloh lantir

Tlabungin Aizawlah lungawiloh lantir
Tlabung Village Council leh Tlabung Welfare Committee chuan National Highway 302 (Lunglei to Tlabung road) siam mekah hnathawktute hmalakna an duhkhawp loh avangin NHIDCL office kawt Tuikhuahtlangah sit-in- demonstration an nei a. NHIDCL general manager office chhungah kawngpui chhe thlalak bunner an tarsak.
Sit-in- demonstration neihnaa Tlabung Welfare hruaitute sawi danin, NH 302 sialthat leh laih zauh hna hi hlawm hnih – package A leh B-ah then a ni a, package A hi 2021 June 30 khan thawh tan niin, package B hi 2021 July 10 a thawh tan a ni. Kum hnih a ral hnu ah pawh hnathawh tur zaa 17 vel bak zawh a la ni lo. Mizoramah tunah hian NHIDCL enkawlna hnuaiah kawng laih that leh sial zauh hna (road construction project) 21 a awm mek a, heng zingah hian NH 302 tih loh chu hnathawh tur zaa 70-90 vel zawh a ni deuh vek tawh.
NH 302 sial zauh leh laih that hna hi a muang mai niloin, laih tawh chin pawh khawl hmanga nawr mamna hnuhma emaw lung phah tur engmah hmuh tur a awm loh avangin ruah a sur hlek chuan a diakin a nal em em a, nitin lirthei veivak an tan bakah chetsual phah tam tak awmin nunna chan phah hial pawh an awm tih an sawi a ni.
“Sial lai a nih vanga chhia a ni tih kan hria a, duhthusama mam leh zawh nuam a ni thei lo tih kan hria. Mah se, ngaihsak leh ngaihpawimawh nise, tun ang em em hian zawh a hrehawm loh anga, mipuiin tuna harsatna kan tawh ang hi kan tawk lo ang. Kum hnih chuang ral hnu pawha tun dinhmun min thlenpuitu SRK Construction and Infrastructure Pvt. Ltd hi thawk zui zel tlakah kan ngai lo,” tiin, a rang thei ang bera contractor rintlak leh thawk tha thei tur hnena pek thuai a nih theihna’n NHIDCL chu hma la turin an phut tih an sawi.
An kawng chungchangah dawhthei takin beiseina nen nghak thin mah se, hma sawn chu sawi loh, kan dinhmun a chhiat tial tial avangin ngawi renga thlir chi ah an ngai loa, lungawilohna hi an lantir tih an sawi a ni.