Tlawm mah se hralh vangin lawm

Mizoram sorkarin sawhthing a lei mek a, an hralh vangin a thartute an lawm. Kum hmasa aiin a tlawm daih a, mahse an hralh hrim hrim vang hian a thartute an lawm niin a lang.
Sawhthing ngah khua Maite-ah chuan mahni khuaah leh Mualphengah an hralh a, nikuma kg-a Rs 70 atanga Rs 90 vel thlenga an hralh kha kuminah Rs 47-in mahni khuaah an hralh. Nikum hmasaah chuan Rs 120-in an hralh. Kuminah a tlawm ta duai a, mahse an hralh hrim hrim vang hian an lawm tih an sawi.
“Hralh hi kan duh a, kan hralh vang hian kan lawm. Nikumah kg-ah Rs 50-a lei min diltu awm se kan phal lo ang. Mahse nikum aiin a rate hi a tlawm na a, kan hralh hi kan lawm tho,” Maite pa pakhat chuan a ti.
Sawhthing chawh zawh hun a ni tawh a, mahse a hralhna lam a chak loh avangin khaw hrang hrangah chawh loh a la tam. An sawi danin, December-a cho tan an awm a, January leh February vel hi a vanglai a ni. March leh April-ah pawh an la cho a, May hi chu chawh hmaih zawn hun a ni tawh. Kuminah erawh chawh loh hi a la tam a, khaw hrang hrang dinhmun a inang lo.
An hralh muan avangin chawh sa dah vuai a tam a, Maite pa pakhat chuan an chawh sa bag 52 kha sorkarin a lak dawnin bag 38 a lo ni tawh tih a sawi.
Dah vuai a tam a, chawh loh a la awm avangin an la cho mek bawk. Hralh zawh an beisei a, phur takin an cho tih an sawi.
Vaiin sawhthing hi an lei ve tho a, Maite-ah chuan Rs 18 te’n an ngam. Kuminah an ngam huai ber laiin Rs 36 a ni. An khuaa lei thinte hian kumin hian sorkar lei sa hi tlawm zawkin an la leh a, chuvangin a thartute hnen atangin an ngam huai lo nia an hriat thu an sawi.