Tlawmngai pawl pathumin thawh ho rel

Tlawmngai pawl pathumin thawh ho rel
Mizorama tlawngai pawl lian pathum – Central Young Mizo Association, Central Young Lai Association leh Mara Thyutlia Py (Mara Thalai Pawl) Gen. Hqrs. chuan inpumkhatna atan leh ram leh hnam tan thawh ho na tha zawk neih zel an rel.
Central YMA huaihawtin Thawhlehni khan heng tlawmngai pawl pathum hruaitute hi YMA Sub-Hqrs Lunglei Conference Hall-ah an inhmukhawm a. Aizawl, Lunglei, Lawngtlai leh Siaha atangin heng tlawmngai pawl hruaitu mi 80 an tel.
Inkawmhona kaihruaitu Central YMA president R Lalngheta chuan he hun buatsaih a nih dan sawiin, Mizorama tlawmngai pawl lian pathumten ram leh hnam hmasawnna atana inpumkhatna tha zawk leh thawhhona tha zawk neih a pawimawh tih a sawi a ni.
Myanmar leh Bangladesh atanga raltlante chungchang thil hrang hrang relin – an huamchhungah theuh raltlante chhinchhiahna fel tak siamin inhriattir tawn nise an ti a. He chhinchhiahna chauh hi sawrkar emaw pawl dang emaw pawhin hmang se an duh tih an sawi. Mizorama an awm chhungin an awmna khua leh tuite duhdanin awmse tha an ti a. Raltlante hmundangah an insawn dawn a nih chuan an awmna NGO hruaitute hriatpuia insawn tura hrilh nise an ti.
Mizorama inkalpawhna kawngpui siam tha tawk lo, a bikin chhimlam tlangdunga kawngpui siamte chu hei aia tha leh tlo zawka siam a nih theihna’n hmalakna tur hrang hrang siam tha an ti a. Ruihhlo do chungchangah pawh theihtawp chhuaha hma lak tlan nise an ti.
Tlawmngai pawl pathum hian inpawhna tha lehzual an neih theihna atan, inkhawmpui lian an hmannaah inpalai tawn a, chanvo inpek tawn thin tha an ti bawk.