US palaiin larsap leh CM kawm

US palaiin larsap leh CM kawm
Mizoram tlawhtu United States consul general Kolkata Melinda Pavek chuan Thawhlehni khan larsap leh chief minister a kawm.
Raj Bhavan-a larsap Hari Babu Kambhampati a kawmnaah consul general chuan Mizoramah sumdawnna kawngah thawhhona a awm em tih a zawt a. Hemi kaihnawih thilah hian larsap chuan horticulture sector – mau hman tangkaina, Dragon fruits adt. bakah services sector – nursing, healthcare & paramedical professions, hospitality adt., tui tha chakna hmanga kawlphetha siam leh kawng danga Mizoramin hma a lak mek thu thlenin a lo sawipui a ni.
Larsap chuan India sawrkarin Mizoramah hmasawnna ruhrel liantham – rel Kawng siam leh national highway tih len hna a thawk mek tih a hrilh a. KMMTTP a puitlin har deuh pawhin rel kawng leh national highways siam hna erawh thawh zawh thuai a ni dawn, tiin, hetih hunah hian kawng tinrengah hmasawnna liantham tak a awm dawn a, Mizoram hmelhmang a danglam dawn a, sumdawnna kawngah pawh tih tur leh thawh tur tam zawk a awm ngei dawn tih US palai hi a lo hrilh a ni.
US consul general Melinda Pavek hian chief minister Zoramthanga pawh a chenna CM bangla-ah a kawm a. Ei leh bar, zirna leh environment lama Mizoram dinhmun zawtin, Mizoram hmathlir a a sawipui a. Myanmar leh India inlaichinnate sawi dunin, khawchhak atanga ruihtheihthil lo thlengin khawtlang nun a nghawng dan an sawi dun bawk.
Kumin March-a Mizoramin B20 meeting a thlen chungchang pawh US palai hian sawipuiin, economy tihhmasawnna tur theihna Mizoramin tha tak a nei chu lawmawm a tih thu te, entrepreneurship lama thalaite hmasawnna chungchangte an sawi a ni.
US palai hian Health minister Dr R Lalthangliana leh chief secretary Dr Renu Sharma te a hran ve ve in a hmu leh bawk.