Tlawng lui kangin PHE timangang Kar 2/1 daih bak tui awm tawh lo

Tlawng lui kangin PHE timangang
Kar 2/1 daih bak tui awm tawh lo
Tlawng lui luang chuan Aizawl khawpui a chawm zo lo tan mek a. Tun ang dinhmun a nih reng a, kar hnih – khat hnu ah pawh ruahtui a la tla lo a nih chuan Aizawl khawpuiin tui lamah harsatna nasa tak a tawk thei reng tawh tih PHE hotute chuan an sawi.
Aizawl Water Trasmission Division executive engineer C Zothantluanga sawi danin, Aizawl khawpui chawmtu Tlawng lui chu GAWSS Phase-I leh Phase-II hmangin nitin tui litre nuai 300 pump thin a ni a, tun dinhmunah Phase-I atangin tui pump tur a awm mumal tawh lo. Tlawng tui chu a kum telin a kangchat tial tial a, tui renchem kawngah mipui thanharh a ngaih bakah Tlawng lui humhalh kawnga theihtawp chhuah theuh turin a ngen.
Tlawng lui tui tlem avanga hetiang dinhmuna kan din mek lai hian, Tlawng hnara tui dahkhawlna tur an siam thar chu a tangkai hle tih a sawi a. Tui dahkhawlnaa tui awmsa leh Phase-II atanga tui pump chhuah mekte hmangin nitin tui an pump dan pangngaiin an la pump thei rih tih a sawi.
Reiek kai Tlawnga tui pump-na hi a hmunah The Aizawl Post chuan May 10 khan a enfiah a, May 9 thleng kha chuan Phase-II atang hian tui luang chhuak tur tlem a la awm tih thawktuten an lo sawi. Nilainia enfiah a nih lai hi chuan tui luang chhuak tur pawh awm tawh loin, tui kam dan chin an teh tawh zawk a ni.
Tlawng luia tui luan tam zawng hi kumtin teh thin a ni a. 2018 April 29 khan MLD (million liter per day) 72.73 luang anga teh a ni a; 2019 April 1 2019 khan MLD 57.21 luang anga teh a ni. 2021 April khan MLD 31.641 a ni a, kum 2022-ah tui a luan that lai ber khan MLD 80 luang anga teh niin, kumin May 9-a tehah MLD 39.39 luang anga teh a ni.
“Kawng laih vang emaw in sak vang emaw pawh nise, environment chhe lo zawng leh humhalh zawnga hma kan lak a pawimawh takzet. Mi hmuh loh vanga lui hnara bawlhhlawh paih maite kan sim a hun bawk. Tlawng kam leh a chhehvela tui hna siam thei tur thing leh mau humhalh bakah thingphun a, enkawl zui a pawimawh hle,” Er C Zothantluanga hian a ti.