Aizawl khawpui chawmtu Tlawng lui tui chuan kiam lam a la pan zel a, PHE Department-in nidanga an pump thin pawh litre maktaduai 10 velin a tlem tawh a, tui renchem turin mipui an chah.
PHE department hian mipui hnenah hriattirna tichhuakin, kuminah Mizoramah thal a na a, Aizawl mipui rinpui ber Tlawng lui pawh hi a ni telin a kam zel a. Hei vang hian nikhata tui litre maktaduai 30 vel pump chhuah thin kha litre maktaduai 24-ah a tla thla a, tunah phei chuan tui hnain a daih tawh tak ngang loh avangin litre maktaduai 20-ah tlak thlak a ngai ta tih an sawi.
Ruah a sur loh a, tui hi a kam zel a nih chuan tui pump chhuah theih zat tur hi nasa taka tlahniam theia ngaih niin, tui semchhuah zat pawh a tla hniam nghal lo thei lo a, tui renchem turin mipui an ngen tih an sawi a ni.
May 10 khan The Aizawl Post palai chuan Aizawl tui lakna lama PHE hotute bia in, Tlawng lui hi a hmunah a lo enfiah tawh a. PHE hotute hian Tlawng tui kam zel hi manganthlak an tih thu te, tun dinhmun bikah phei chuan kar hnih khat hnu ah ruahtui a la tla lo a nih chuan tui pump tur mumal awm lo thei a nih thu te, Greater Aizawl Water Supply Scheme Phase-I phei chu tu pump tur a awm tawh loh thu te an sawi a. Tlawng tui hi a kum tela a kam tial tial avangin lui humhalh leh tui hna siam thar kawngah tan lak a ngai hle nia an hmuh thu te an lo sawi tawh a ni.
Tlawng tuiin kiam lam pan zel
Get real time updates directly on you device, subscribe now.