Tling tharte kan lawmpui – MNF

MNF chuan an party aiawh leh party dang atanga MLA tling tharte an lawmpui a, mipui tan thahnemngai taka thawk turin an duhsak tih an sawi.
MNF Gen. Hqrs. thuchhuak chuan, Mizoram inthlanpui tluang taka nei a, vote chhiar pawh zawh a nih hnu ah, mipui duhthlanna hmanga thlantlin, sawrkar thar hmel kan hmu dawn ta tih sawiin, sawrkarna siam tur ZPM chu MNF chuan a lawmpuiin, Mizo mipuiin beiseina nena an thlirte tihlawhtling tur leh thahnemngai taka thawk turin duhsakna a hlan tih a sawi.
MNF candidate-te duhsak taka lo vote tute chungah lawmthu an sawi a, MNF candidate thlantlin zawng zawng leh party dang candidate thlantlin zawng zawng an lawmpui takzet tih sawiin, MNF MLA thlantlinte pawh eptu MLA tangkai tak ni turin duhsakna a hlan a, tlingzo ve ta lote a tawrhpui tih a sawi bawk.
Vote chhiar buaipui a, thawktu zawng zawng chungah lawmthu a sawi bakah sawrkar thar hmalakna ngun taka thlirin, Mizoram leh hnam tan theihtawp chhuahin hna a thawk zel dawn tih MNF hian a sawi a ni.