TNT – an rah chin apiang an ram!

TNT – an rah chin apiang an ram!
Thutak Nunpuitu Team-in an hmabak hlen zelin Nilaini zanah 3-1-in an elpui kumhlun Hunthar an hneh a, tournament kal laiah la chak fai vek chungin Tata SK 712 Pro Volleyball League semi-final an khel dawn.
Knockout round lut chiang sa tawh ve ve ni mah se Mizoram volleyball-a team langsar pahnih inkarah inelna danglam leh nasa a lang chhuak thar leh a; 25-23, 25-17, 20-25, 25-22-in an an chetthat vanglai hmang mek TNT an chak.
R. Dengthuama Indoor Stadium, Mualpuiah a khatin mipui an pungkhawm a; net bula Hunthar vuak dang hnem tak Zosangzuala (Mama) chuan point 16 hmuin tum li a hloh a, a vawikhatna’n D3 Business Player of the Match lawmman a dawng.
D3 Business Fan’s of the Night atan TNT supporter ruhkawl Shelly thlan a ni.
League vawi nga an khelhah TNT chak vekin Vanlaltanchhana chuan tum 26 vaw tlain point 13 a paih a, khel tha bera thlan a nih loh hmasak berah intelruh leh tha takin a pawlte a thawhhopui a, Huntharin suttlang an harsat.
Mizo hlanga champion hmasa ber ni thei turin TNT-in rin an hlawh fal ta viau a, point hloh loa league an khelh zawh hnuah Tuipuiral leh Tuichangral chak zawk nen semi-final-ah an intawng ang.
Season kal meka trophy pahnih la tawh Huntharin rin ber ni chungin Pro Volleyball an khel a; derthawng loa vawi hnih an chak zawn hnuah Inrinni khan kai thar Tuipuiral lakah set hnih an hloh a, chak tho mah se an lakah rinhlelhna a awm phah.
TNT hmaah rintlak an nihzia lantir zo loin set hmasa pahnih an hloh zawn nghal a; set thumna tirah beisei pha lo Gagandeep Singh lachhuakin an hahchawlhtir tluan a; Zomuansanga’n hmun pawimawh luahin vawi 21 a hlap tla a, point 14 paihin set khat bak an sualchhuak zo lo.
Tun season kal laia nghet leh tlo taka insiamlian tawh Hunthar player leh team pumpuiin an nihna an hloh then nasa. Rinrawla an hman thin Laldensanga’n vawi khat chiah vaw tlain point ruk a paih a, Lalramnunfela’n point riat hmu mah se Densanga tihsual zat tho a hloh.
Team tichak tura Punjab atanga an lakluh Gagan chuan set hnih a khelh chhungin point 11 a thawkchhuak na a, tum sarih paihin lehlamin net bulah a vuak an dansak tam. A khelh chhungin a che a zuai hle a, team boruak a pawthniam.
Set khatnaah insawrbing takin an inbei tawn a, Gagan chuan vaw tlain Huntharin tlang theihna hun tha an nei hmasa a, 24-23-in hma an hruai. Zomuana’n remchang hmu zuiin a hlap a, ban phar sang tak Valbuanga’n a dan thlaksak.
Sadraka Fanai chuan hui tla ve lehin, TNT-in 25-24-in hma an hruailet a, point khat hmuh belha set lak theihna hun an neih hmasak berah captain Vanlalchhantluanga Sailo chuan point hlu tak a thawkchhuak.
Set hnihnaah 17-17 thlengin an intluk chho leh. Setter Lalliankima’n fing taka a hui tlak atangin TNT-in point riat an hmu zawn a, set an la zawn. Hetih chhung hian Hunthar talbuaiin Densanga leh Lalruatfela Sailo chuan court pawnah an vaw chhuak a, 24-17-a an hniam laiin Gagan chuan a nam kai lo bawk.
Set thumna tirah 2-2 a nih laiin Hunthar coach VL Malsawma Renthlei chuan Gagan a lachhuak. Khawhai tlangval Zomuana chungah rinna a nghat, Mizo hlanga an khelh atangin hneh takin an nawrlet.
Inkhel thununin a tira lut paruk zinga tel lo Lalhruaizela’n rang takin a vaw tla a, 23-15-in an sang zui. TNT tan set hloh a hnai a, Valbuanga lachhuaka an hahchawlhtir hnuah point nga hmuh belh thei mah se fal taka hmahruai tawh Hunthar an dal zo tawh lo.
Set an hloh hnuah TNT insiamthar lehin vaw tla thei zawk an nih bakah lehlam vuak dang tura net bula an ban pharin awmzia a nei a, 20-14-in hma an hruai. Huntharin vuak tlak an harsat laiin Zomuana an chhawr rim a, ani’n beiseina siamsakin 21-21-in an nih rual ve leh hman.
Mama’n tum hnih vaw tla zawnin TNT thinphu a tireh a, chefuh thei lo Densanga’n a vuak sual hnuah 24-22-in Hunthar an hniam. Mipui thawm ri hum hum karah Valbuanga’n tha zetin a vaw tla a, team pahnih inkar a chingfel a ni.
Pro Volleyball-a an intawn hnuhnun vawi hnihah TNT an chak zawn a; nikum khan league-ah Huntharin set thum la zawnin chungnung takin an hneh a, mahse, semi-final lamah TNT-in an tlawmna chhangletin 3-2-in Hunthar an vaw tla.
Pro Volleyball hmasa ber 2016 khan league-a sang ber ni chungin TNT an champion zo lo a; kum 2022 khan tuna TNT-in league-a an bitum an hneh fai vek ang hian Huntharin chungchuang takin knockout round an lut a, mahse, final thleng pha loin an tla.
Pathumnaa awm mek Huntharin zaninah league an khel zo dawn a, semi-final hmaa an dinhmun siamnghehthar leh tumin an chung chiaha inhung Chhinga Veng Spikers an hmachhawn ang.