Endik ngun building sak a tha thei lo
Tlungvel rama Eklavya Model Residential School sak mek leh luah tan tawh chu a building sak a chhe hle tih sawi a ni a. A sak hna zaa 80 vel zawh a nih laiin contractor hnenah sum zaa 90 chuang pek a ni tawh. A endiktu lam chuan a viltu tur department-in an vil tha lo niin an ngai. Mizoram State Project Monitoring Committee (MSPMC) chuan Eklavya Model Residential School (EMRS) Tlungvel sak mek hi a vawi thumna atan Inrinni khan a endik a. Heng endikna hrang hrangah hian lungawina tur a awm tam lo tih an sawi.
A sakna atan hian sawrkar laipui Ministry of Tribal Affairs chuan cheng vaibelchhe 24 a ruahman a, vbch. 23.3361 a sa turin VRS Construction Zonuam Aizawl hnenah restricted tender hmangin 2019 December 20 khan work order pek a ni. He hna hi kum hnih (2021 December 20 thleng) chhunga sa zo tura beisei a nih laiin, endik a nih lai hian zaa 80 vel bak zawh a la ni lo. A sum erawh zaa 94 (Rs. 20,91,61,321) pek chhuah a ni tawh thung.
Administrative building sak mekah a banpui chu cement chak lam tehna, rebound hammer hmanga endiknaah, M20 tling pha ngei tur a nih laiin, pakhat mah tling a awm lo a. Hetiang a nih lai hian, heng ban hi a chunglam sak zawm theih turin ruahman a ni lawi. A design dik lo leh kim lo a awm nual a, dimension dah loh a tam bawk, tih chu hmuh dan a ni. In chungah tui put a awm vek a, a ban leh bangah patek a awm tam a, hei hian school naupang hriselna a khawih a, thawmhnaw hmuar leh hmanrua chhia a awm tam phah nia ngaih a ni.
Administrative building hi Rs.4,42,16,000 senga sak niin academic kum tharah class 10 awmna tur chhunzawm tum ni mah se, he room tur hi a la awm lo.
Guest house pumpui sak hna zaa za zo tawh angin EMRS official-te chuan sawi mah se, bulding dang ang bawkin slab chung zawka tui tling thei leh hnam siamthat tura tih siam a la ni loa. Tui luankawr mumal tak siam tura tih pawh siam a la ni lo.
Endiktute hian building sak dan phung (concept) hi a dik lo hle niin an sawi a. Hna quality chhia an ti bawk. Endik a nih lai hian, bathroom kawngkhar a awm loa, a ban an tehnaah pawh M-20 a tling lo deuh vek. Chutih laiin, Planning department-in he building sak hna thawh hi tha tawk tiin, cheng vbch. 29.4 chu a pe chhuak vek tawh.
Endiktute hian EMRS Guest house hi mikhual thlenna atan a tlak loah ngaiin, naupang nu leh pate thlenna atan pawh a him tawk lo niin an ngai.
Boys & girls hostel-ah endik hmasak ami, tui far leh hnâm avangin electric fit dan fuh tawk lo a awm a, toilet kawngkhar quality a chhe hle a, tukverhah tlak dal (bar) a awm lo nia sawiin, building chak zawng tur pawh a tling lo vek tih an sawi.
Type-III quarters, teaching staff quarters leh non teaching staff quarters luah tlaka sak zawh a la awm loa, a tulna avanga invawm luha luahte an awm. Heng building hi concrete chhun a tha loa, tui a hnam deuh vek a ni. Endik hmasa bera siamtha tura tih pawh siam mumal a la awm lo. Heng building zawng zawng hi work drawing anga sak a awm lo a. Work drawing-ah chuan quarters zawng zawng hi plinth height awm tura tih ni mah se, plinth height awm loa sak vek a ni thung.
Ram zau takah khawpui chep tak ang maiin block tin sak a ni a. Ground floor-ah ruahtui a luanglut thei a. Quarters hi sak zawh a la ni lo chungin, rawng hnawih leh tukverh vuah a awm tawh tih sawi a ni.
Endik a nih lai hian, engineer mawhphurtu tumah an awm loa, him lo leh inhliam theihna, hna duhdah a tam tih sawi a ni. Endiktute chuan, a drawing atanga dik lo sa a nih avangin contractor pawhin harsatna nei tura a nih laiin, harsatna nei lo ang maiin a duh duhin a sa ni berin a lang tih an sawi.
EMRS campus building-in a kentel ho hi central ministry lamin duh dan a neih zulzuia duan vek tur leh thuneitute duh dan tling lo chu pawm loh tur a nih laiin, nodal department lam pawhin he project hi a vil uluk lohzia a langchiang tih an sawi a ni.
“Project enkawl dan tura enkawl a ni lo leh hna tling lo tlinga pawma sum tam tak pek chhuah a ni hi a fel lo hle. Heti taka hna chhia a nih bakah a hna kal chak lo lutuk hi a bul berah chuan nodal department enkawl dan leh, hna kal nena inhen lo taka sum pek chhuah tam hi harsatna thlentu bera ngaih theih a ni,” tiin MSPMC Team ruala endiknaa kal chanchinbumite chuan an sawi.
A sak hna thawktute hian, inchung zawng zawng khik chhanah Tlungvel khaw bul stone quarry-a lung halin a nghawr vangah an puh a. Mahse, MSPMC Team chuan chhuanlam tlingah an ngai lo tih an sawi. Heng building ban, cement chak zawng hniam lutuk hi contractor chuan a ranglama thuam chak (structural retro fit) a tum tih a sawi a ni.
EMRS Tlungvel sakna hmun hi ram awl a ni a, project bul lamah Social Welfare department-in a enkawl a, 2025 April 1 atangin Planning & Programme Implementation department-in a enkawl zawm a ni.
EMRS Tlungvel hna hrang hranga sum senna –
School building – Rs 4,42,16,000
Boys hostel – Rs 3,53,81,000
Girls hostel – Rs 3,53,81,000
Kitchen & dining – Rs 89,05,000
Principal quarters – Rs 39,24,000
Type-III quarters 2 – Rs 2,48,88,000
Type-II quarters 1 – Rs 1,20,35,000
Guest house – Rs 29,40,000