Top 10 luah pha lo Nadal
Record siama chawlhkar 912 chhung zet ATP ranking-a top 10 luah tawh Rafael Nadal chuan Indian Wells khelh loh vangin a point 600 khawl a hum zo lo a, a luah lai atanga pen li ngawta a hnungtawlh hnuah top 10 luah zo loin ranking tharah 13-na a ni ta!
Tarlan tak angin, Grand Slam-a vawi 22 champion tawh Spaniard hi hliam vangin Indian Wells-ah a inlan thei lo a, Thawhtannia ranking thar tarchhuahah kum 2005 hnu lama a vawikhatna atan top 10 a tawlhchhuahsan a; hei hi a dinhmun ni mah se Paris tournament lian khel tura a dam hman phawt chuan kumin French Open-a champion tum ngam tan paltlang ngai hraw ber pawl la ni tho tura ngaih a ni.
A khel bawr na la damchiang thei lo avangin kumin January thla khan Australian Open title a kawl lai humhim tura a chetchhuahnaah second round a paltlang zo lo a, California thlaler hmuna Masters 1000 event khelh zawh takah pawh inlan thei lo zui zelin, Thawhtannia number one thar rawn ni ta Carlos Alcaraz hi Nadal-a’n top 10 a luah tirh lai khan kum hnih a la tling lo!
French Open inbuatsaihna atan thla thar maia khelh tur Monte Carlo Masters hmachhawn turin Nadal hi a inbuatsaih ve mek a; a career-a tum 14 a champion tawhna Roland Garros-ah hian grand slam title a la leh thei a nih chuan top 10 huang hi chu a luahkir leh nghal maiin a rinawm.
Nikum Paris tournament lian final-a Nadal hneh loa tlawm world number four Casper Ruud khan Spaniard hi a la dahsang vet vet hle a, tunah hliam buaipui rih mah se kum 36 miin a title kawl lai a humhim leh a nih pawhin mak a tih hauh loh tur thu a sawi!
Top 10 luah pha lo Nadal
Get real time updates directly on you device, subscribe now.
Prev Post