Top 10 pawna tawlhchhuak Sindhu
Karliamta Swiss Open-a a title kawl lai a humhim zawh loh avangin PV Sindhu chuan tunkar Thawhlehnia badminton hmeichhe singles ranking thar tarchhuahah top 10 a luah zo ta lo.
Double Olympic me-dallist Sindhu hi BWF ranking thar berah 11-na niin, point 60,448 a khawl chuan world top 10-a inhamtang turin a chhan zo lo a, kum sarih chhunga a vawikhatna atan a sang zual 10-a a lan phak loh vawikhatna a ni.
Kum 27 mi Hydera-bad nula hi hliam atanga thochhuakin tun season-ah khelmual lut leh tawh mah se ngai a la awh famkim lo tih a khelh dan atangin a hriat theih a, ranking thar lamah pawh pen hnih laiin a hnungtawlh ta a ni.
World champion pawh lo ni tawh Sindhu hian a career-ah world number one dinhmun la luah pha lo mah se a thlen san berah world number 2 lai a ni ve tawh a; kum 2016 November thla atang khan top 10 a luah chho ngar ngar a, tunkarah a sang zual 10 hi a luah pha ta lo a; top 10 hrim hrim a luah hmasakber chu kum 2013 August kha a ni.
BWF ranking thar men’s singles lamah star Indian shuttler dang HS Prannoy chu world number 8 a ni chhunzawm a; hetih lai hian Kidambi Srikanth erawh 21-naah tlahniamin, Lakshya Sen chuan 25-na a luah
Kar hmasaa khelh zawh Swiss Open champion Satwiksairaj Rankireddy leh Chirag Shetty inkawp chuan world number six position luahin, women’s doubles pair Treesa Jolly leh Gayatri Gopichand erawh an hum ngai 18-naah an ding.
Top 10 pawna tawlhchhuak Sindhu
Get real time updates directly on you device, subscribe now.