Tottenham leh Liverpool te an chak

December 9, Thawh leh zan khan UEFA Champions League, League phase khelh chhunzawm a ni a, English club pathum; Tottenham, Liverpool leh Chelsea te an inlan. Tottenham leh Liverpool ten hnehna an chan laiin Chelsea an tlawm thung.
Spurs an chak awlsam
London club lian Tottenham Hotspurs chuan an mualah Slavia Prague an mikhual. An mikhual laka an khelh that bakah an vannei tel a, own-goal an neih bakah penalty vawi hnih an hmu bawk. Own-goal leh penalty vangin 3-0 ngawtin hnehna an chang a, an mualah awlsam pangngai taka hnehna changin point thum an hmu.
Spurs hian an mikhual Slavia Prague an nawr viau a, an che fuh thuai bawk. Minute 26-naah David Zima chuan an lamah a ti-goal palh hlauh a, mualneitu Spurs hmahruaina goal a thunsak. Vanneih goal vanga hma an hruai hnuin khel tha thawkhat mah se Spurs hian chawlhlawk hmain goal an thun belh thei bik lova, 1-0 a hmahruai chungin chawlhlawk an hmang.
Chawlhlawk hnu lamah Spurs an khel tha chhunzawm a, goal an thun belh leh thuai. Second half tan hnu lawkah penalty an hmu. He penalty hi Mohammed Kudus chuan awlsam takin a pet goal a, minute 50-naah an goal hnihna a thun a, an hmahruaina a tizau.
Si hniha hma an hruai hnuin Tottenham an vannei chhunzawm leh , penalty an hlawhchhuah zui leh. Penlaty hnuhnung zawk hi Xavi Simons chuan minute 79-naah an pet goal a, an goal thumna thunin a tawp a khar. Simons goal thun hnu hian inkhel hmuhnawm zui viau mah se goal erawh a luh belh thei tawh lo. Tottenham chuan an mualah 3-0 in hnehna an chang a, point thum hlu tak an hmu zui ta a ni.
Tottenham hian UCL season kal mekah vawi 6 khel tawhin point 11 an hmu a, pakuanaah an awm mek. Table chung lam pariat ten direct in last 16 an lut dawn a, team 16 dangin play-off an khelh zui leh a ngai dawn thung. Spurs hian direct a last 16 lut turin chet that zui an la mamawh zui ang.
Liverpool tan hnehna lian
Thawhleh zan hian English club lian, EPL-a champion lai ni mek Liverpool chu Italian Serie A club lian Inter Milan hmachhawn turin San Siro-ah an leng lut. Khelmual chhung leh pawn lamah pawh boruak tha nei thei rih lo Liverpool hi Mohamed Salah tel lovin an inlan nawn leh a. Salah tel lovin champions league-ah hnehna lian an chang a, point thum hlu tak an hmu.
San Siro-ah Champions League 2024-25 a finalist Inter Milan leh Liverpool te an inhnehtawk viau a, goal pawh a lut har hle. Goal thun tuma an innawr tawn chhen hnu, hun tawp dawn hnaih lamah Liverpool an vannei a, penalty an hmu. Penalty hi khel tha tluang tak Dominik Szoboszlai chuan minute 88-naah a pet goal a, hmahruaina goal a thun. Hun tawp dawna an goal thun venhim ngei tumin Reds in thapui an thawh a, derthawng tak chungin an him tluan thei a, 1-0 a Inter Milan hnehin hnehna lian an sualchhuak.
Season kal meka khel tha tluang hleithei lo Liverpool hian champions League-ah vawi ruk khel tawhin point 12 an hmu a, direct a last 16 lut thei dinhmun hniam ber pariatnaah an awm mek. Nilai zan khan UCL hi khelh chhunzawm a ni a, Liverpool dinhmun hi danglam dawrh thei dinhmunah a ding thung.
Liverpool a player pawimawh leh langsar ber tia chhal ngam Mohamed Salah chu manager Arne Slot chuan a hnawl nawn leh a, langsar taka a lungawi loh thu sawitu Salah hian squad-ah hmun a chang lo. Inkhel pawimawhah hnawl a nih tak zel vangin Salah hian January thlaah Anfield a chhuahsan ngei a rinawm a, Saud Arabia club ten lak an tum hle.
Chelsea an tlawm
Tottenham leh Liverpool ten hnehna changa point thum an hmuh laiin London club lian Chelsea erawh Italian club Atalanta hneh lovin an tlawm ve thung. Mimualah an tlawm vangin Chelsea tan direct a last 16 lut thei turin beih nasat a ngaih phah leh zual dawn.
Season kal meka chetha tluang hleithei meuh lo Chelsea hi Atalanta hmachhawn turin Gewiss Stadium ah an lenglut. Mikhual an nihna hmunah bul an tan tha a, goal thun hmasa zawkah an tang. Chelsea tan hian João Pedro chuan minute 25-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hnu lamah Atalanta in an si phurh sut ngei tumin tan an khawh a, goal pawh an thun ta thuai. Minute 55-na lekah Gianluca Scamacca chuan goal thunin an si phurh a sut. 1-1 a an inhnehtawk reng hnuin hun tawp dawn hnaiah mualneitu an che fuh nawn leh a, minute 88-naah Charles De Ketelaere chuan hma an hruai letna goal a thun. He goal hmang hian hnehna an chang a, team lian lakah point thum hlu tak an hmu zui ta a ni.