Tourism chawikan leh Mizoram

Ni hnih awh Anthurium festival chu zawhfel a lo ni leh ta a. Tun tum festival-ah hian hnam dang hmel hmuh tur pawh tum dang ai chuan an thahnem ta deuh niin a lang. Mizoram hian tourist a hip chho mek a, record-a a lan dan phei chuan ni tin zali/zanga rual hi tourist an lo lut ve tawh a ni awm e. Anthurium festival chhim tur hrim hrima lo kal te pawh awm bawk mah se, festival chhimtu domestic tourist tam zawk kha chu Mizorama an awm lai nena innang a nih vang te pawh a ni.
Forbes magazine chuan India ram hi khawvel huapa ram mawi a thlanchhuah 50 zinga 7-naah a dah a. India GDP-a tourism thawhchhuah hi kum 2018 khan 10% a tling a, hei hi tun hnai kum 10 chhunga a san ber tum a ni. Kum 2020 atangin Covid-19 avangin a hniam leh a, 2019-ah 7%, 2020-ah 4.3%, 2021-ah 5.8%. Hrileng a kiam hnu hian tlem tlemin a sang chho leh hret hret mek a ni.
India ram hi ram mawi thlan chhuah zinga 7-na hial hauhtu kan ni chung hian, Top 50 zinga keini aia potential nei chhe zawk ramten tourism industry hi ram economy chawikangtu atan an hmang tangkai zawk a. Hei hi India chuan hriain ram economy chawikan nan tourism industry lamah nasa zawka tan lak a pawimawh a ni tiin, state tinte chu tourism promote nan phuahchawp festival pathum tal siam theuh turin a hriattir a. Anthurium festival pawh hi chutiang atana 2006 atanga kalpui tan kha a ni.
Mizorm pawh hi India ram zingah rau rau chuan tourism promote nana potential nei tha pawl kan ni a, keini aia potential nei tha zawk ni lem lo ten tourism atangin sum an hailut tha zawk a. Khawvel huapa India dinhmun ang deuhin Mizoram pawh hi India ram pum huapa tourism potential nei tha, mahse la chhawr tangkai thiam lo kan ni, a tih theih awm e.
Social media a chak ang bawkin tourist-in min rawn luhchilh dan pawh hi a chak a, a lo dawngsawngtu lam hi kan chet chak a pawimawh dawn hle a ni.