Tourism leh Mizoram

‘Tourism Awareness Week 2024’ chu tourism minister Lalrinpuii’n kar kalta Inrinni khan millennium centre kawtah a hawng a. Tourism awareness week hman chhung hian thupuiah “Tourism for All” tih hmangin tourism chungchang inzirtirna te, khaw thlan bikte tan intihsiakna leh talk show te huaihawt tum a ni a. Tourism minister chuan, tourism hmasawn theihna ‘potential’ tam tak a la awm thu sawiin, tourism chungchanga kan rilru puthmang leh kan dawnsawn danah hma kan sawn tlan a pawimawh, tiin a sawi bawk.
Tun hma kum 30 vel liam ta atang tawh khan, Mizorama rorelna in sang ber legislative assembly-ah, Mizoram chu ‘tourism potential nei tha’ tiin ram hruaituten an lo sawi thin tawh a. Tourism industry hi kan state economy chawikangtu a ni thei, an ti thin bawk.
State economy chawikang dawrh theitu tourism potential tha tak nei inti si hian tourism hi kan la chhawr tangkai thiam lo hle a, ‘potential tha tak’ hi kan la utawk tûr vawn vel mai mai ni hian a ngaih theih a. Tuna sawrkar thar pawh hian, sawrkar hmasate tih dan ang bawkin an rawn auchhuahpui ve leh ta chu a ni a. Potential tha tak hi eng tin nge an rawn haichhuah dawn tih hi mipuiin kan thlir ber tur chu a ni leh ta a ni.
Tourism-ah hian potential kan nei tha a ni ang, sawrkar laipui atanga mi pawimawh lo zin ten hun rei lo te an cham chhunga an sawi tlang lawn tak pakhat chu, ‘Mizoram chu in vannei, ramhmul damdawi in nei tha, tourism lamah potential in nei tha..’ tih te a ni thin. A ram leilung fate hian kan nei tha tih kan inhria a nih pawhin, a chhawr tangkai dan kan la haichhuak thiam tawk lo tihna a ni ang, tun thlenga economy kan la chawikantir dawrh theih loh danah hian.
Tourism promote dan turah pawh hian, systematic deuh hleka thil kalpui a tul awm e. IT hmasawnna hian tourist-te pawh hi a ko lut chak ta hle mai a, chutih laiin tourist ten an cham chhunga nuamsa taka khawsakna tur ‘accomodation infrastructure’ tha leh nuam an hmuh loh chuan an zawngchhang lo mai pawh ni lovin, IT kaltlang bawkin social media lamah ‘negative comment’ an theh darh leh mai ang tih a hlauhawm a ni. Tourist-te lo dawnsawn dan tur kan inzirtir rual hian, an cham chhunga nuam taka an khawsak theihna tur lam buatsaih pawh hi ngaihthah chi a ni hauh lo.
Tun hma ngaihtuah chuan, tourism promote lamah hma kan sawn nasa tih a lang reng mai. Mizoram Tourism Police-te pawh 2019 khan kan lo nei dim diam tawh a nih kha; khangte kha tourist entry leh exit lamah an inzar pharh ta em? Intuaithar reng hi kan mamawh a ni.
Tourism department lam hmalakna a hmuhnawm tan e. Tourism hi state thenkhat ten state economy backbone-a an hmang thei tawh ang hian, Mizoram tourism department pawh hian beihpui han thlak ve se, ram leh hnam thatna tak tak duhna rilru pu chungin tan han la sauh sauh teh se.