Sam Smith leh Kim Petras te chuan an hla hit ‘Unholy’ avangin Grammy Award- best pop duo/group performance an dawng a, Kim Petras hi transgender hmeichhe zinga Grammy dawng hmasa ber a ni ta a ni.
-- Advertisement --
Petras chuan award dawn lawmthu sawinaah, “Ekhai leh, ka va lawm tak em. Ka tan chuan zinkawng ropui tak a ni…Sam-a’n award hi dawng turin min duh a, a chhan chu transgernder hmeichhe zinga he award dawng hmasa ber ka nih vang a ni. Ka hmaa transgender ropui tak tak lo awm tawh te chungah lawmthu ka sawi a, zanina heta ka awm theihnan ka tana he kawngka lo kik hawngtute an ni,” a ti.
Petras hian a nu pawh lawmthu hrilhin, “Kawng sir maia awm thin kan ni a, chu chu ka seilenna a ni…ka nuin hmeichhia ka nih a ring a, a support-na tel lo chuan heta ding chhuak tur hi ka awm hauh lo vang. Vawiin thlenga ka chunga rinna nghattu te, in zavaiin ka hmangaih vek che u. Sam, nang hi vantirhkoh dik tak, ka nuna ka hero i ni e. He hla a puitlin theih nana tha thawhtu zawng zawng te u, ka hmangaih vek che u,” a ti bawk.
‘Unholy’ hi October 2022 khan Billboard Hot 100 (singles) chart-ah No.1 a kai a, Global 200 chart-ah pawh kar li chhung a No.1 nghe nghe a ni.