Viola Davis chuan kumin Grammy Awards-ah a audio book ‘Finding Me’ avangin Best Audio Book, Narration and Storytelling Recording category-ah Grammy a dawng a, heti hian entertainment khawvela award ngaihhlut pali dawng kimin EGOT recipient a ni ta a, milar zingah EGOT dawng thei 18-na a ni.
-- Advertisement --
Award a dawn lawmthu sawinnaah Viola Davis chuan, “Awi karei, he lehkhabu hi naupang kum 6 mi Viola puala ka ziah a nia, a nun, a hlimna, a tawrhna leh a engkim puala ka tih a ni. Zinkawng duhawm a va ni tak em. Ka EGOT ve ta tlat mai!” a ti.
EGOT-ah hian Emmy Awards (TV lema chawimawina), Grammy Award (rimawi lama chawimawina), Oscar (film/cinema lama chawimawina) leh Tony Awards (live-a stage-a lemchan thiamte chawimawina) te dawng kim vek thei tihna a ni a, lemchan leh rimawi khawvela award ngaihhlut vek an ni. Viola Davis hian 2001 khan Play for King Hedley II avangin Tony Awards-ah Best Featured Actress a dawng a, 2015-ah How to Get Away with Murder avangin Emmy Award-ah Outstanding Lead Actress a dawng a, 2017-ah ‘Fences’ avangin Oscar-ah Best Supporting Actress a dawng tawh bawk.