Treasury bazar insawn turin ti

Treasury bazar insawn turin ti
Tunhnaia Aizawl Treasury Bazar kang ta hmun chu tih ruah a, heta thute hi a thlang, Tuikual South huamchhunga AMC Multi-Complex ah sawn an ni dawn tih Aizawl mayor Lalrinenga Sailo chuan a sawi. Heta insawnte hi kum khat fee chawi loin a thlawnin an luah dawn tih a sawi a ni.
AMC hotute sawi danin, Treasury bazar leh a chhehvel hi survey neih a ni tawh thin a. Kum 2016- 2017 chhung khan thutna (vendor table) 150 chuang siama pek a ni a. Hemi rual hian an insawnna tur buaipui nghal niin, tuna AMC Complex hi ruahman a ni. 2016 December 9 khan Treasury Bazar Association leh AMC chuan inremna thu ziakin, he bazar hi AMC-in tha a tih hunah titawpin, hmundanga sawn theih a ni anga, bazara hmangtuten harsatna an siam loh tur thu an intiam a ni. Inremna thua inziak angin AMC leh Treasury Bazar Association thawhonain bazar hman lai mek hi temporary-a cheithat a ni.
2023 March 20-ah AMC leh Treasury Bazar Association hi an thukhawm leh a. Association ngenna hrang hrang sawihoin, AMC chuan chak takin hma a la a, a tihlawhtling nghal a ni. Chu’ng zingah chuan sa zawrhna hmun siam danglam, drain mumal zawk siam a tel.
AMC chuan 2023 November 14 khan 2019 December-a an inrem tawhna angin AMC Multi-Complex Tuikual South-a insawn thla turin a hriattir a. Treasury Bazar Association hian 2023 November 22 khan Aizawl Municipal commissioner-ah ngenna thlenin, 2023 Krismas vuakvet chauh bazar hluia thut phalsak turin an dil a ni. AMC Executive Council chuan 2024 kumtharah insawn vek turin a ti a ni.
Treasury Bazar Association-in I&PR building-a SHG dawr hawn chu ‘bazar area’ a nih anga tihtawp sak tura AMC an ngen angin, AMC hian a tul angin hma a laksak a. I&PR department pawhin AMC ngenna ngaipawimawhin SHG Mart hi a khar a ni.
2024 May 1 khan AMC hian hriattirna tichhuak lehin, 2024 May 6 ralhmaa insawn thla vek turin a ti leh a; 2024 May 27 & 31 leh June 1 khan Treasury Bazara thilzuara thutute insawn tura hriattirna chu tualchhung chanchinbu ah a chhuah leh a ni.