Tribal volunteer-te MZP-in tlawh

Manipur buaina avanga tribal lam mipui venghimtute dinhmun hriatpui tur leh Zofaten harsatna an tawh hrang hrang enfiahin July 12 MZP Gen. Hqrs hruaitute Manipur-ah an kal.
Manipur tualchhung buaina avanga hnam tana beitute chu an duty-na hmun hmun hrang hrang, Lamka leh a chhehvel (frontline) ah tlawhin an dinhmun an enfiah a. Damdawi chi hrang hrang Rs. 80000 chuang man semral a ni a, sumfai pek a ni bawk.
July 12 zan khan Joint Student Body Lamka buatsaihin, he buaina avanga nunna chante hriatrengna ‘candle light vigil’ hman a ni a. Hriatrengna hun hmannaah hian MZP president Lalnunmawia Pautu chuan tun hi tanrual hun a ni a, inlakhran hun a ni lo, tiin, “Kan insuihkhawm a, kan inlungrual loh chuan kan chhehvela min do mektute hian min hneh theihna an nei a ni,” a ti. Zofaten chhan tur ram leh hnam kan la nei chu a lawmawm hle, tiin, Mizoram mipui, NGO leh sawrkar chu Manipur Zofate lama an tang tlat tih a sawi a ni.
MZP hruaitute hian Hmar Students Association Gen. Hqrs pawh an tlawh a, tunhnaia rawng taka thah David Thiek ralin, ralna hi HSA hruaitute hnenah hlan a ni.
‘Manipura Zofate chuan buaina an tawh mekah Mizoram sawrkar, kohhran, political party, NGO leh mipuiin an ngaihsaknaah an lawm hle tih an lo sawi a ni,’ MZP Gen. hqrs. thuchhuak chuan a ti.