Ningani khan Tripura an inthlang a, Mizoram chhuahsantu Tuikuk-te pawhin a vawi khat nan Tripura-ah vote an thlak. An hruaitute chuan Mizoram nen a inan loh thu leh an lunglen thu te an sawi.
“Mizoram nen a inang lo lutuk a, nuam kan ti lo. Kan lung a leng a, kei pawh ka lung a leng khawp mai,” Mizoram Bru Displaced People’s Forum (MBDPF) vice president Laldawngliana chuan a ti.
“Hetah chuan tlawmngaihna a awm ve lo. Polling station vel pawh a nuam lo a, a ti thei leh a chak deuh an awm a, chutiang ni ve lo tan chuan a nuam lo a, inchuh a ngai,” a ti bawk.
Mizoram inthlan leh Tripura inthlan a inan loh thu a sawi a, Mizoramah chuan tha takin an campaign mai tia sawiin, Tripura-ah chuan lirtheia kawngzawh an uar a, an intamsiak tih a sawi a, zan lamah pawh an peih chhung chu ring deuh deuhin thu an sawi mai thin tih te a sawi.
“Mizoramah chuan candidate-te kha mipuiin kan hria a, voter-te pawhin kan be mai a. Hetah chuan candidate-te hi mipuiin kan hre lo a, inthlan ni-ah pawh kan hmu ve tak tak lo a,” a ti bawk.
Mizoram chhuahsantu Tuikuk-te hi Tripura hmar lam relief camp-ah hun engemaw chen an awm a, Mizorama kir lovin Tripura-ah awm se tih a nih hnuah Tripura electoral roll-ah thun an ni ta a ni. Camp-a mite hi MBDPF-ah an inthlungkhawm a, MBDPF hruaitute chuan political party hrang hrangin an vote an beisei thu leh an mite chu anmahni vote tura hrilh tura an ngen thu te an sawi a, mahse vote tur hi an inhrilh lo niin an sawi.
“Kan vote hi a hlawm ang em tih chu kan hre lo a, mahse vote tur hi kan inhrilh lo a, a lo hlawm a nih pawhin kan duh a inang tihna a ni mai ang,” MBDPF vice president chuan a ti a, bial pasarihah an awm thu leh an tam berna Kanchanpur bialah chuan voter 7000 vel an awm thu te a sawi.
Tripura inthlanah Mizoram chhuahsantute’n vote thlak ‘Mizoram nen a inang lo lutuk a, kan lung a leng’
Get real time updates directly on you device, subscribe now.
Next Post